ஸ்ரீவில்லிபுத்தூா் தேவாலயம் சந்திப்பு நிறுத்தத்தில் பேருந்துகள் நின்று செல்ல அதிகாரிகள் நடவடிக்கை எடுக்க வேண்டும் என பொதுமக்கள் கோரிக்கை விடுத்தனா்.
ஸ்ரீவில்லிபுத்தூா் தேவாலயம் சந்திப்பு பகுதியில் ராஜபாளையம் செல்லும் பேருந்துகளுக்கு கிளைச் சிறை எதிரிலும், பேருந்து நிலையம் செல்லும் பேருந்துகளுக்கு நகா் காவல் நிலையம் முன்பும், சிவகாசி செல்லும் பேருந்துகளுக்கு தேவாலயம் எதிரிலும் பேருந்து நிறுத்தம் செயல்படுகின்றன.
இதில் கிளைச் சிறை, காவல் நிலையம் பகுதிகளில் தன்னாா்வ அமைப்புகள் சாா்பில் பயணிகள் நிழல்குடை அமைக்கப்பட்டன.
தேவாலயம் சந்திப்பில் போக்குவரத்து நெரிசலை ஒழுங்குப்படுத்த போக்குவரத்து சிக்னல் அமைக்கப்பட்டது.
இந்த வழியாக செல்லும் பேருந்துகள் நிறுத்தத்தில் பயணிகளை இறக்காமல், போக்குவரத்து சிக்னல் அருகே நிறுத்தி இறக்குவதால் அடிக்கடி போக்குவரத்து நெரிசல் ஏற்படுகிறது.
இதனால், பயணிகளும் சிக்னலில் நின்று ஏறிச் செல்கின்றனா்ய இதன் காரணமாக, பயணிகள் நிழல்குடை இரு சக்கர வாகனங்கள் நிறுத்துமிடமாகவும், சமூக விரோத செயல்கள் நடைபெறும் இடமாகவும் மாறி வருவதாக பொதுமக்கள் புகாா் தெரிவிக்கின்றனா்.
எனவே, பேருந்து நிறுத்தத்தில் பேருந்துகள் நின்று செல்ல அதிகாரிகளி நடவடிக்கை எடுப்பதுடன், நிழல்குடையில் பயணிகளுக்கு தேவையான அடிப்படை வசதிகளை ஏற்படுத்த வேண்டும் என பொதுமக்கள் கோரிக்கை விடுத்தனா்.
