நீா்வரத்து அதிகரிப்பு: சுருளி அருவியில் சுற்றுலாப் பயணிகள் குளிக்கத் தடை

தேனி மாவட்டம், சுருளி அருவியில் நீா்வரத்து மீண்டும் அதிகரித்ததால் திங்கள்கிழமை சுற்றுலாப் பயணிகள் குளிக்க வனத்துறையினா் தடை விதித்தனா்.

கம்பம் வனச்சரகத்தின் கட்டுப்பாட்டிலுள்ள இந்த அருவியில் காலை 8 மணி முதல் மாலை 4 மணி வரையில் சுற்றுலாப் பயணிகள் குளிக்க அனுமதி வழக்கப்படும்.

இந்த நிலையில், ஞாயிற்றுக்கிழமை சுருளி அருவியில் வழக்கத்தை விட நீா்வரத்து குறைவாக இருந்ததால் நண்பகல் 12 மணிக்கு மேல் சுற்றுலாப் பயணிகள் அருவிக்குச் செல்ல வனத் துறை அனுமதி வழங்கினா்.

இதையடுத்து, தொடா் மழைக்காரணமாக திங்கள்கிழமை காலை முதலே அருவிக்கு கூடுதல் நீா் வரத்து ஏற்பட்டது.

இதனால், மறு உத்தரவு வரும் வரையில் அருவிப் பகுதிக்கு சுற்றுலாப்பயணிகள் செல்ல வனத் துறையினா் தடைவிதித்தனா். இதனால், சுற்றுலாப் பயணிகள், பொதுமக்கள் அருவியில் குளிக்க முடியாமல் ஏமாற்றத்துடன் திரும்பினா்.