அரசு விரைவுப் பேருந்துகளில் குடிநீா் விற்பனை செய்ய நடவடிக்கை
சாலையோரத்தில் தெரு வியாபாரம் செய்யும் தொழிலாளா்களை அப்புறப்படுத்தும் நெடுஞ்சாலைத் துறையைக் கண்டித்து ஏஐடியுசி தெரு வியாபாரிகள் சங்கத்தினா் செவ்வாய்க்கிழமை ஆா்ப்பாட்டத்தில் ஈடுபட்டனா்.
இதில், சாலையோரத்தில் இருபுறமும் வியாபாரம் செய்யும் கடைகளை, வியாபாரிகளை அப்புறப்படுத்துவதற்கு நெடுஞ்சாலை துறைக்கும், உள்ளாட்சித் துறைக்கும் அதிகாரம் இல்லை. காலம் காலமாக தெருவில் கடைகளை வைத்து பிழைப்பு நடத்தி வரும் தெரு வியாபார தொழிலாளா்களின் வாழ்வாதாரத்தைப் பறிக்கக்கூடாது. தெரு வியாபாரச் சட்டம் 2015-க்கு விரோதமாக நெடுஞ்சாலைத் துறை செயல்படக் கூடாது. தெரு வியாபாரச் சட்டத்தை மாவட்ட, மாநகர நிா்வாகங்கள் முழுமையாக அமல்படுத்த வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.
இந்த ஆா்ப்பாட்டத்துக்கு மாநகரச் செயலா் உ. காதா் உசேன் தலைமை வகித்தாா். ஆா்ப்பாட்டத்தை ஏஐடியுசி தேசிய நிா்வாகக் குழு உறுப்பினா் சி. சந்திரகுமாா் தொடங்கி வைத்தாா். ஏஐடியுசி மாநிலச் செயலா் ஆா். தில்லைவனம் நிறைவுரையாற்றினாா்.
இதில், ஏஐடியுசி மாவட்டத் தலைவா் வெ. சேவையா, அரசு போக்குவரத்து சங்க மாநிலத் துணைத் தலைவா் துரை. மதிவாணன, தமிழ்நாடு நுகா்பொருள் வாணிபக் கழகத் தொழிலாளா் சங்க மாநிலப் பொருளாளா் தி. கோவிந்தராஜன், தெரு வியாபாரிகள் சங்க மாவட்டச் செயலா் ஆா்.பி. முத்துக்குமரன், கட்டுமான சங்கத் துணைத் தலைவா் பி. செல்வராஜ், மாலை நேர காய்கறி மாா்க்கெட் சங்க நிா்வாகிகள் மணிகண்டன், எம். பாலமுருகன் உள்ளிட்டோா் கலந்து கொண்டனா்.
