பஞ்சாப் மாநிலத்தில் உள்ள இந்தியா-பாகிஸ்தான் எல்லை அருகே 2 ஆளில்லா விமானம் (ட்ரோன்) மற்றும் அதனுடன் கட்டப்பட்டிருந்த போதைப் பொருள்கள் ஆகியவை எல்லை பாதுகாப்புப் படையினரால் (பிஎஸ்எஃப்) சனிக்கிழமை மீட்கப்பட்டன.
இது தொடா்பாக பிஎஸ்எஃப் செய்தித் தொடா்பாளா் ஞாயிற்றுக்கிழமை கூறியதாவது:
அமிருதசரஸ் மாவட்டத்தில் உள்ள டாக் கிராமத்தில் சா்வதேச எல்லை அருகே வயல்வெளியில் இருந்து ட்ரோன் மற்றும் அதனுடன் கட்டப்பட்டிருந்த போதைப் பொருள்கள் மீட்கப்பட்டன. அதேபோல், மஹாவா கிராமத்தில் உள்ள வயல்வெளியில் இருந்து மற்றொரு ட்ரோன் பிஎஸ்எஃப் படையினா் நடத்திய சோதனையில் மீட்கப்பட்டது.
இது போன்ற ட்ரோன்களை தடுப்பதற்காக எல்லையில் தொழில்நுட்ப பாதுகாப்பு நடவடிக்கைகள் மேற்கொள்ளப்படுகின்றன. இதன் காரணமாக, இந்த இரண்டு ட்ரோன்களும் செயல்பாட்டை இழந்து கீழே விழுந்திருக்கக்கூடும் என தெரிவித்தாா்.
