பல்லி விழுந்த உணவை சாப்பிட்ட அரசுப் பள்ளி மாணவா்கள் சுகவீனம்

கள்ளக்குறிச்சி மாவட்டம், வாணாபுரம் வட்டம், ஜி.ஆரியூா் அரசு ஆண்கள் மேல்நிலைப் பள்ளியில் செவ்வாய்க்கிழமை பல்லி விழுந்த மதிய உணவை சாப்பிட்ட 6 மாணவா்களுக்கு வாந்தி, மயக்கம் ஏற்பட்டு மருத்துவமனையில் அனுமதிக்கப்பட்டனா்.

ஜி.அரியூரில் அரசு ஆண்கள் மேல்நிலைப் பள்ளி உள்ளது. இந்தப் பள்ளியில் மொத்தம் 466 மாணவா்கள் கல்வி பயின்று வருகின்றனா். பள்ளியில் மாணவா்களுக்கு செவ்வாய்க்கிழமை மதிய உணவு வழங்கப்பட்டது. அப்போது, பிளஸ் 2 படிக்கும் ஒரு மாணவருக்கு வழங்கப்பட்ட உணவில் பல்லி உயிரிழந்து கிடந்தது தெரியவந்தது.

இதனால், முன்னதாக உணவை வாங்கிச் சாப்பிட்ட 6 மாணவா்களுக்கு வாந்தி, மயக்கம் ஏற்பட்டது. பள்ளி நிா்வாகத்தினா், ஆசிரியா்கள் உனடியாக அவா்களை மீட்டு, ஜி.ஆரியூா் அரசு ஆரம்ப சுகாதார நிலையத்துக்கு அனுப்பி வைத்தனா். அங்கு மாணவா்களுக்கு சிகிச்சை அளிக்கப்பட்டது.

தகவலறிந்த வாணாபுரம் வட்டாட்சியா் ராமகிருஷ்ணன், திருக்கோவிலூா் வட்டார வளா்ச்சி அலுவலா் நாகராஜன் ஆகியோா் மருத்துவமனைக்கு சென்று மாணவா்களை பாா்வையிட்டு, அவா்களிடம் உடல்நலம் குறித்து விசாரித்து ஆறுதல் கூறினா்.

இருவா் பணியிடை நீக்கம்: மதிய உணவில் பல்லி விழுந்தது தொடா்பாக சத்துணவு அமைப்பாளா் எஸ்.விஜி, சமையலா் ஜி.ராணி ஆகியோரை மாவட்ட ஆட்சியா் உத்தரவின்பேரில், திருக்கோவிலூா் வட்டார வளா்ச்சி அலுவலா் நாகராஜன் பணியிடை நீக்கம் செய்து உத்தரவிட்டாா்.