கள்ளக்குறிச்சி மாவட்டம், சின்னசேலம் அருகே பெண் கிராம நிா்வாக அலுவலா் மீது மாட்டுச் சாணத்தை பூசி தாக்குதல் நடத்தியதாக பணியிடை நீக்கம் செய்யப்பட்ட பெண் கிராம உதவியாளரை போலீஸாா் செவ்வாய்க்கிழமை கைது செய்தனா்.
சின்னசேலம் வட்டம், வடக்கனந்தல் கிராமத்தில் (மேற்கு) கிராம நிா்வாக அலுவலராக பணிபுரிந்து வருபவா் வி.தமிழரசி (39). இதே அலுவலகத்தில் கிராம உதவியாளராக பணியாற்றியவா் சங்கீதா. இவா், தமிழரசியை அலுவலகத்துக்குள் வைத்து பூட்டிவிட்டு, அலுவலகக் கோப்புகளை வீட்டுக்கு எடுத்துச் சென்றது தொடா்பாக கடந்த டிசம்பா் மாதம் பணியிடை நீக்கம் செய்யப்பட்டாா்.
கிராம நிா்வாக அலுவலா் தமிழரசி அலுவலகத்தில் செவ்வாய்க்கிழமை பணியில் இருந்தாா். அப்போது, அங்கு பையுடன் வந்த சங்கீதா, தான் மறைத்து எடுத்து வந்திருந்த மாட்டுச் சாணத்தை தமிழரசி முகம் மற்றும் உடலில் பூசி, அவரை கடுமையாகத் தாக்கினராம்.
இதில் காயமடைந்த அவா் மருத்துவச் சிகிச்சைக்குப் பின்னா், கச்சிராயப்பாளையம் காவல் நிலையத்தில் புகாரளித்தாா். போலீஸாா் வழக்குப் பதிந்து சங்கீதாவை கைது செய்தனா்.
