பள்ளிகளில் ’சாலைப் பாதுகாப்பு பிரச்சார’ திட்டம்: மத்திய அமைச்சா்கள் தலைமையில் கூட்டம்

நமது சிறப்பு நிருபா்

‘சாலைப் பாதுகாப்பு பிரசார’த்தில் நிகழ் 2025-ஆம் ஆண்டில் குழந்தைகள், இளைஞா்கள் சாலைப் பாதுகாப்பை செயல்படுத்தவா்களாகவும், பயனாளிகளாகவும் மையப்படுத்த மத்திய சாலைப் போக்குவரத்து மற்றும் நெடுஞ்சாலைகள் துறை அமைச்சா் நிதின் கட்கரி, மத்திய கல்வித் துறை அமைச்சா் தா்மேந்திர பிரதான் ஆகியோா் தலைமையில் புதன்கிழமை ஆலோசனை நடைபெற்றது.

சாலைப் பாதுகாப்பு பிரசாரம் தொடா்ந்து மூன்றாவது ஆண்டாக நடைபெற்றது. ‘மற்றவா்களையும் கவனிங்கள், நீங்களும் பாதுகாப்பாக இருங்கள்’ (‘பா்வா கரெங்கே, சுரக்ஷித் ரஹேங்கே’ ) என்கிற கருப்பொருளில் நிகழாண்டு இப்பிரசாரம் மேற்கொள்ளப்படுகிறது.

குறிப்பாக குழந்தைகள் மற்றும் இளைஞா்கள் சாலைப் பாதுகாப்பை செயல்படுத்துபவா்களாகவும் பயனாளிகளாகவும் நிகழாண்டு மையப்படுத்தும் வகையில் இந்தப் பிரசாரம் நடைபெறுகிறது. இதற்கு இந்திய சாலைப் போக்குவரத்து மற்றும் நெடுஞ்சாலை அமைச்சகத்தால் பள்ளி, கல்லூரிகளில் நாடு தழுவிய முயற்சிகள் மேற்கொள்ளப்படுகின்றன.

மாணவா்களிடம் விழிப்புணா்வை ஏற்படுத்துவதையும் சாலைப் பாதுகாப்பு நடைமுறைகளை மேம்படுத்துவதையும் நோக்கமாகக் கொண்டு பிரசாரம் மேற்கொள்ளப்படுகிறது. இதை முன்னிட்டு மத்திய கல்வித் துறை அமைச்சகத்தில் மத்திய சாலைப் போக்குவரத்துத் துறை அமைச்சா் நிதின் கட்கரி, கல்வித் துறை அமைச்சா் தா்மேந்திர பிரதான் ஆகியோா் தலைமையில் இரு துறை அதிகாரிகள் இணைந்து பங்கேற்ற கூட்டம் நடைபெற்றது.

‘குழந்தைகளும், இளைஞா்களும் தான் எதிா்கால வாகன ஓட்டுநா்கள் அல்லது தாக்கம் செலுத்துபவா்களாக உள்ளனா். அவா்களின் பங்கை உணா்த்தும் வகையில், சாலைப் பயனா்களிடம் பொறுப்புணா்வு ஏற்படுத்துவது, மற்றவா்களுக்கு பாதுகாப்பு, மரியாதையை முன்னுரிமைப்படுத்த ஊக்குவிக்கும் விழிப்புணா்வு நிகழ்ச்சிகளை ஏற்படுத்துவது’ ஆகியவை குறித்து கூட்டத்தில் விவாதிக்கப்பட்டது என மத்திய கல்வித்துறை சாா்பில் தெரிவிக்கப்பட்டது.

பின்னா், இக்கூட்டம் குறித்து மத்திய கல்வித்துறை அமைச்சா் தா்மேந்திர பிரதான் தனது எக்ஸ் வலைத்தளத்தில் பதிவிட்டாா். அதில், ‘சாலைப் பாதுகாப்பு என்ற முக்கியமான பிரச்னை குறித்த கூட்டத்தில் மூத்த அமைச்சா் நிதின் கட்கரியுடன் இணைந்து பங்கேற்றேன். சாலை விபத்துகள், பாதுகாப்பற்ற முறையில் வாகனம் ஓட்டுதல் ஆகியவை உலகளவில் லட்சக்கணக்கான உயிா்களை ஆபத்தில் ஆழ்த்துகிறது. தனிநபா் நல்வாழ்வு, பொது சுகாதாரம், பொருளாதார உற்பத்தித் திறனில் சாலைப் பாதுகாப்பு இயக்கத்தின் முக்கியப் பங்கை உணா்ந்து, பாதுகாப்பான சாலைகள் மற்றும் பாதுகாப்பான சமூகங்களுக்கான கூட்டு நடவடிக்கைக்கு பள்ளிகளுக்கு மத்திய அரசு அழைப்பு விடுத்துள்ளது.

இந்தியா முழுவதும் உள்ள பள்ளிகளுக்கு ‘சாலைப் பாதுகாப்புப் பிரசார’ திட்டத்தை விரிவுபடுத்துவதற்கும், பள்ளிக் கல்வி முறை மூலம் எடுக்க வேண்டிய நடவடிக்கைகள் குறித்தும் கூட்டத்தில் ஆலோசிக்கப்பட்டது. சாலைப் பாதுகாப்பு நடவடிக்கைகள் குறித்த விழிப்புணா்வு, பாதுகாப்பு கலாசாரத்தை ஊக்குவித்தல், பொறுப்பான வாகனம் ஓட்டும் நடத்தைகள் போன்ற ஈடுபாட்டிற்கு கல்வி அமைச்சகம் இணைந்து பணியாற்றும் என தா்மேந்திர பிரதான் தெரிவித்துள்ளாா்.