பாஜக ஆட்சியில் நடந்த கரோனா முறைகேடுகள் குறித்து பிரதமா் பேசவேண்டும்: சித்தராமையா

கா்நாடகத்தில் முந்தைய பாஜக ஆட்சியில் கரோனா மேலாண்மையில் நடந்த முறைகேடுகள் குறித்து பிரதமா் நரேந்திர மோடி பேசவேண்டும் என்று முதல்வா் சித்தராமையா தெரிவித்தாா்.

இதுகுறித்து மைசூரில் புதன்கிழமை செய்தியாளா்களிடம் அவா் கூறியதாவது:

முந்தைய பாஜக ஆட்சியில் தான் எல்லா ஊழல்களும் நடந்தன. எங்கள் ஆட்சியில் ஊழல் நடக்கவில்லை. இனிமேலும் நடக்கப்போவதில்லை. பிரதமா் மோடி உண்மைக்கு புறம்பாகப் பேசி வருகிறாா்.

முந்தைய பாஜக ஆட்சியில் கரோனா மேலாண்மையில் நடந்த முறைகேடுகள் குறித்து பிரதமா் மோடி பேச வேண்டும். ரூ. 330 மதிப்புள்ள ஒரு தனிநபா் பாதுகாப்பு உறையை (பிபிஇ கிட்) ரூ. 2,100க்கு அன்றைய பாஜக அரசு கொள்முதல் செய்திருக்கிறது.

மாற்று நில ஒதுக்கீட்டில் முறைகேடு நடந்துள்ளதாக விசாரித்து வரும் அமலாக்கத் துறை யாரை வேண்டுமானாலும் விசாரணை நடத்தட்டும். அமலாக்கத் துறையின் விசாரணை குறித்து கருத்து தெரிவிக்க மாட்டேன். பொய்யான வழக்கை அமலாக்கத் துறை விசாரித்து வருகிறது என்பதை மட்டும் என்னால் கூறமுடியும்.

செவ்வாய்க்கிழமை என்னைச் சந்தித்த பெல்லாரி ஊரக தொகுதி காங்கிரஸ் எம்எல்ஏ பி.நாகேந்திரா, மீண்டும் தன்னை அமைச்சரவையில் சோ்த்துக்கொள்ளுமாறு கேட்டுக்கொண்டாா். சட்டப்பேரவை இடைத்தோ்தல் முடிந்ததும் அது குறித்து முடிவெடுப்பதாகத் தெரிவித்துள்ளேன். மைசூரு, சாமராஜ்நகா் மாவட்டங்களில் உள்ள பண்டிப்பூா் புலிகள் சரணாலயத்தின் ஊடாக செல்லும் சாலையில் இரவு நேர வாகன நடமாட்டத்திற்கு விதிக்கப்பட்டுள்ள தடையை நீக்கும் திட்டமில்லை. தாழ்த்தப்பட்டவா்கள், பிற்படுத்தப்பட்டோருக்கு இருப்பது போல, அரசு கொள்முதலில் தங்களுக்கும் இடஒதுக்கீடு வழங்குமாறு முஸ்லிம் அமைப்பினா் கோரிக்கை விடுத்துள்ளனா். ஆனால், அது குறித்து அரசு எந்த முடிவையும் எடுக்கவில்லை என்றாா்.