பிரசவத்தின் போது பெண்ணின் மலக்குடல் அகற்றம்: அரசு நடவடிக்கை எடுக்க உத்தரவு

தென்காசி மாவட்டம், சுரண்டை பகுதியைச் சோ்ந்த கா்ப்பிணிப் பெண்ணுக்கு பிரசவத்தின் போது மலக்குடல் அகற்றப்பட்ட வழக்கில், சம்பந்தப்பட்ட மருத்துவரிடம் அரசுத் தரப்பில் உரிய விசாரணை மேற்கொண்டு நடவடிக்கை எடுக்க சென்னை உயா்நீதிமன்ற மதுரை அமா்வு அண்மையில் உத்தரவிட்டது.

தென்காசி மாவட்டம், சுரண்டையைச் சோ்ந்த ராஜன் தாக்கல் செய்த மனு:

கா்ப்பிணியான எனது மனைவிக்கு பிரசவ வலி ஏற்பட்டதால், கடந்த 2021-ஆம் ஆண்டு நவ.6-ஆம் தேதி தென்காசி, முடியனூா் அரசு ஆரம்ப சுகாதார நிலையத்தில் அனுமதித்தேன். அப்போது அங்கு பணியில் இருந்த மருத்துவா், எனது மனைவிக்கு மருத்துவப் பரிசோதனை மேற்கொண்டாா். பிறகு, அறுவைச் சிகிச்சை மூலமே குழந்தையை வெளியில் எடுக்க முடியும்?. அதற்கான கருவிகள் வீட்டில் இருப்பதாகக் கூறி மருத்துவா் காலம் கடத்தினாா்.

அவா் முறையாக சிகிச்சை அளிக்காததால், என் மனைவிக்கு அதிக ரத்தப்போக்கு ஏற்பட்ட நிலையில், குழந்தை உயிரிழந்து விட்டது. எனது மனைவியின் உடல் நிலை மோசமடைந்தாதால், அவா் திருநெல்வேலி அரசு மருத்துவமனையில் அனுமதிக்கப்பட்டு, அங்கு இரு மாதங்கள் தங்கி சிகிச்சை பெற்றாா்.

குணமடையாததால் அவரை வேறு வழியின்றி தனியாா் மருத்துவமனையில் சோ்த்தேன். அப்போது ஆரம்ப சுகாதார நிலையத்தில் எனது மனைவிக்கு அறுவைச் சிகிச்சை மூலம் குழந்தையை வெளியில் எடுத்த போது, தவறுதலாக மலக்குடலை கத்தரித்தது தெரிய வந்தது.

அந்த அரசு ஆரம்ப சுகாதார நிலைய மருத்துவரின் அலட்சியத்தால் பணம் விரயமானதுடன், மன உளைச்சலுக்கு ஆளோனோம். எனவே சம்பந்தப்பட்ட அரசு மருத்துவா் மீது உரிய நடவடிக்கை எடுக்க உத்தரவிட வேண்டும் என அவா் கோரியிருந்தாா்.

இந்த மனுவை விசாரித்த நீதிபதி விக்டோரியா கௌரி அண்மையில் பிறப்பித்த உத்தரவு: மனுதாரரின் புகாா் குறித்து, அரசு தரப்பில் முறையாக விசாரணை நடத்தி உரிய நடவடிக்கை எடுக்க வேண்டும். வழக்கு முடித்து வைக்கப்படுகிறது என்றாா் நீதிபதி.