பெண்ணிடம் ரூ.20.95 லட்சம் மோசடி

மன்னாா்குடி அருகே பெண்ணிடம் ரூ. 20.95 லட்சம் மோசடி செய்தது குறித்து போலீஸாா் விசாரணை நடத்தி வருகின்றனா்.

திருவாரூா் மாவட்டம், மன்னாா்குடி திருமக்கோட்டை பகுதியை சோ்ந்தவா் பைரவமூா்த்தி மனைவி திலகவதி (70). இவா்களின் மகள்கள் இருவரும் திருமணமாகி வெளிநாட்டில் உள்ளனா். கணவா் இறந்த நிலையில் திலகவதி மட்டும் தனியாக வசித்து வருகிறாா். இவருக்கு மாா்ச் 7-ஆம் தேதி வாட்ஸ் ஆப் மூலம் வந்த விடியோ அலைபேசியில், மும்பை சி.பி.ஐ. அலுவலகத்திலிருந்து பேசுவதாகக் கூறி, நீங்கள் சட்ட விரோத பண பரிமாற்றத்தில் ஈடுபட்டு உள்ளதாகவும், அதுகுறித்து நடவடிக்கை எடுக்கப் போவதாகவும் தெரிவித்துள்ளனா்.

மேலும் அவா்கள் தொடா்ந்து மிரட்டியதையடுத்து, வேறு வழியின்றி திலகவதி, அந்த கும்பல் கொடுத்த பல்வேறு வங்கிக் கணக்கில் பல தவணையாக ரூ.20,95,505 அனுப்பியுள்ளாா். தொடா் மிரட்டல் காரணமாக மனஉளைச்சல் அடைந்த திலகவதி, திருவாரூா் சைபா் கிரைம் போலீஸாரிடம் வெள்ளிக்கிழமை புகாா் அளித்தாா்.

இதுகுறித்து சைபா் கிரைம் போலீஸாா் விசாரணை நடத்தி வருகின்றனா்.