பெண்ணுக்கு வீடு வழங்க பரிந்துரைப்பதாக அமைச்சா் உறுதி

திருச்சுழி அருகேயுள்ள வேலாயுதபுரத்தில் சிதிலமடைந்த வீட்டில் வசித்து வந்த பெண்ணுக்கு கலைஞா் கனவு இல்லத் திட்டத்தின் கீழ், வீடு வழங்க பரிந்துரைப்பதாக அமைச்சா் தங்கம் தென்னரசு உறுதியளித்தாா்.

திருச்சுழி ஒன்றியத்துக்குள்பட்ட வேலாயுதபுரம் கிராமத்தில் நடைபெற்ற நிகழ்ச்சியில் நிதி, சுற்றுச்சூழல், காலநிலை மாற்றத் துறை அமைச்சா் தங்கம் தென்னரசு அண்மையில் கலந்து கொண்டாா். அப்போது, இந்தக் கிராமத்தில் மகள், பேரக் குழந்தைகளுடன் வசிக்கும் ராணி, தான்னுடைய வீடு சேதமடைந்துள்ளதாகவும், தனக்கு அரசு சாா்பில் வீடு வழங்க வேண்டும் என அமைச்சரிடம் கோரிக்கை மனு அளித்தாா்.

பின்னா், அந்த வீட்டுக்கு நேரில் சென்று அமைச்சா் பாா்வையிட்டாா். அப்போது, வீட்டின் மேற்கூரை ஓடுகள் சேதமடைந்திருப்பதுடன், மழைக் காலத்தில் தண்ணீா் வீட்டிற்குள் புகும் நிலையறிந்தாா்.

இதையடுத்து, அந்த பெண்ணுக்கு கலைஞா் கனவு இல்லத் திட்டத்தின் கீழ் வீடு வழங்க உடனடியாக பரிந்துரை செய்வதாக உறுதியளித்தாா்.