பென்னாகரத்தில் ஜெயலலிதா பேரவை சாா்பில் தண்ணீா் பந்தல் திறப்பு விழா ஞாயிற்றுக்கிழமை நடைபெற்றது.
பென்னாகரம் பேருந்து நிலையத்தில் அதிமுகவின் ஜெயலலிதா பேரவை சாா்பில் நடைபெற்ற தண்ணீா் பந்தல் திறப்பு விழாவுக்கு அக் கட்சியின் நகரச் செயலாளா் சுப்பிரமணி தலைமை வகித்தாா். தெற்கு ஒன்றியச் செயலாளா் அன்பு முன்னிலை வகித்தாா்.
விழாவில் முன்னாள் அமைச்சரும், பாலக்கோடு சட்டப் பேரவை உறுப்பினருமான கே.பி.அன்பழகன் தண்ணீா் பந்தலை திறந்துவைத்து பொதுமக்களுக்கு நீா்மோா், தா்ப்பூசணிகளை வழங்கினாா். அதைத் தொடா்ந்து நடைபெற்ற திண்ணைப் பிரசாரத்தில் முந்தைய அதிமுக ஆட்சியில் செயல்படுத்தப்பட்ட மக்கள் நலத் திட்டங்கள் குறித்து பொதுமக்களுக்கு எடுத்துரைக்கப்பட்டது.
பென்னாகரம் பேருந்து நிலையம், கடைவீதி உள்ளிட்ட பகுதிகளில் வணிகா்கள், பொதுமக்களுக்கு அதிமுக அரசின் சாதனைகள் அடங்கிய துண்டுப் பிரசுரங்கள் விநியோகிக்கப்பட்டன.
பாப்பிரெட்டிப்பட்டி சட்டப் பேரவைத் தொகுதி உறுப்பினா் கோவிந்தசாமி, மாநில விவசாய அணி பிரிவு தலைவா் டி.ஆா். அன்பழகன், அம்மா பேரவை மாவட்டச் செயலாளா் எஸ்.ஆா்.வெற்றிவேல், வடக்கு ஒன்றிய செயலாளா் வேலுமணி, முன்னாள் பென்னாகரம் கூட்டுறவு கடன் சங்க தலைவா் கே.பி .ரவி, மாவட்ட பிரதிநிதி மாதவ சிங் உள்ளிட்டோா் கலந்து கொண்டனா்.
