தில்லியின் வடக்குப் பகுதியிலுள்ள நரேலா தொழில்துறை பகுதியில் சட்டவிரோதமாக தங்கியிருந்ததாகக் கூறப்படும் வங்கதேச தம்பதியினரையும் அவா்களின் குழந்தையையும் காவல்துறை கைது செய்துள்ளதாக புதன்கிழமை அதிகாரி ஒருவா் தெரிவித்தாா்.
இது குறித்து வடக்கு தில்லி காவல் சரக துணை ஆணையா் நிதின் வல்சன் ஒரு அறிக்கையில் கூறியுள்ளதாவது: குழந்தையுடன் கைது செய்யப்பட்டுள்ள இந்த தம்பதியினா் அனைத்து சட்டப்பூா்வ முறைகளும் முடிந்த பிறகு அவா்கள் நாடுகடத்தல் மையத்திற்கு அனுப்பப்படுவாா்கள். ஒரு ரகசியத் தகவல் கிடைத்ததால், குடும்பத்தினா் தடுத்து வைக்கப்பட்டிருந்த பகுதியில் உள்ள ஒரு வாடகை அறைக்கு போலீஸாா் சென்றனா். அவா்கள் ஹிலால் ஹுசைன் (36), மற்றும் அவரது மனைவி தஸ்லிமா அக்தா் (32) என அடையாளம் காணப்பட்டுள்ளனா்.
வங்கதேசத்தி் பா்குனா மாவட்டத்தைச் சோ்ந்த ஹிலால் ஹுசைன், பல ஆண்டுகளாக இந்தியாவில் வசித்து வந்தாா். அவா் ஆரம்பத்தில் தனது பெற்றோருடன் யமுனா புஷ்தா ஜுக்கியில் குடியேறினாா். பின்னா் பவானாவில் உள்ள ஜேஜே காலனிக்கு குடிபெயா்ந்தது விசாரணையில் தெரிய வந்தது. அவா் உள்ளூா் பால் கடையில் தினசரி கூலியாக வேலை செய்து வந்தாா்.
விசாரணையின் போது, வங்கதேசத்தைச் சோ்ந்த தஸ்லிமாவை சுமாா் ஐந்து ஆண்டுகளுக்கு முன்பு திருமணம் செய்து கொண்டதாக ஹிலால் ஹுசைன் தெரிவித்தாா். அன்றிலிருந்து இந்த ஜோடி நரேலாவில் வசித்து வருகிறது. ஆதாா் அட்டை வைத்திருந்த போதிலும், இந்தியாவில் சட்டப்பூா்வமாகத் தங்கியிருப்பதை உறுதிப்படுத்தும் எந்தவொரு செல்லுபடியாகும் பயண அல்லது குடியேற்ற ஆவணங்களை ஹிலால் ஹுசைன் சமா்ப்பிக்கத் தவறிவிட்டாா் என்று அந்த அதிகாரி தெரிவித்தாா்.
