விழுப்புரம் மாவட்டம், கண்டாச்சிபுரம் அருகே பேருந்து இயக்க நேரம் தொடா்பான பிரச்னையில், அரசுப் பேருந்தின் பக்கவாட்டுக் கண்ணாடிகளை உடைத்து சேதப்படுத்தியதாக தனியாா் பேருந்து ஓட்டுநா் உள்ளிட்ட மூவா் மீது போலீஸாா் வழக்குப் பதிந்துள்ளனா்.
கள்ளக்குறிச்சி மாவட்டம், திருக்கோவிலூா் பேருந்து நிலையத்திலிருந்து சென்னைக்கு சனிக்கிழமை காலை அரசுப் பேருந்து புறப்பட்டது. பேருந்தை விழுப்புரம் மாவட்டம், செஞ்சி வட்டம், அணையேரியைச் சோ்ந்த பா.செல்வம் (56) ஓட்டினாா்.
இந்த பேருந்து திருக்கோவிலூா்-கண்டாச்சிபுரம் சாலையில் மடவிளாகம் கால்நடை மருத்துவமனை அருகே சென்றபோது, அதே திசையில் பின்னால் வந்த தனியாா் பேருந்தின் ஓட்டுநா், நடத்துநா், பரிசோதகா் ஆகிய மூவரும் அரசு பேருந்தை வழிமறித்து, அரசுப் பேருந்து ஓட்டுநரான செல்வத்திடம் வாக்குவாதம் செய்தனராம்.
தொடா்ந்து, அரசுப் பேருந்தின் பக்கவாட்டுக் கண்ணாடிகளை மூவரும் உடைத்தனராம்.
இதுகுறித்த புகாரின் பேரில், கண்டாச்சிபுரம் போலீஸாா் வழக்குப் பதிந்து தனியாா் பேருந்து ஓட்டுநா் ரஷீத் (25), நடத்துநா் சிறிதா் (24), பயணச்சீட்டுப் பரிசோதகா் தாமோதரன் ஆகிய மூவா் மீதும் வழக்குப் பதிந்துள்ளனா்.
