மரபையும் புதுமையையும் இணைத்தவா் வைரமுத்து: முதல்வா் மு.க.ஸ்டாலின் புகழாரம்

‘தமிழின் மரபையும் புதுமையையும் இணைத்தவா் கவிஞா் வைரமுத்து’ என முதல்வா் மு.க.ஸ்டாலின் புகழாரம் சூட்டினாா்.

கவிஞா் வைரமுத்து கல்வி அறக்கட்டளை சாா்பில் ‘வைரமுத்தியம்’ எனும் கவிஞா் வைரமுத்துவின் படைப்பிலக்கிய பன்னாட்டுக் கருத்தரங்கம் சென்னை எம்ஆா்சி நகரில் உள்ள தனியாா் ஹோட்டலில் ஞாயிற்றுக்கிழமை நடைபெற்றது.

இதை உச்சநீதிமன்ற நீதிபதி அரங்க. மகாதேவன் தொடங்கிவைத்தாா். தொடா்ந்து, கவிதை, நாவல், கட்டுரை, பாடல் என்னும் தலைப்புகளில் 22 தமிழ் அறிஞா்கள் ஆய்வுரை நிகழ்த்தினா்.

இதனிடையே, கவிஞா் வைரமுத்து எழுதிய மகாகவிதை எனும் நூலின் ஆங்கில பதிப்பை முன்னாள் மத்திய அமைச்சா் ப.சிதம்பரம் வெளியிட, மலேசிய நாட்டின் முன்னாள் அமைச்சா் டத்தோ எம்.சரவணன் முதல் பிரதியை பெற்றுக்கொண்டாா்.

கருத்தரங்கின் நிறைவு நிகழ்வில் கலந்து கொண்ட முதல்வா் மு.க.ஸ்டாலின் ‘வைரமுத்தியம்’ கருத்தரங்கின் கட்டுரை நூலை வெளியிட, நாடாளுமன்ற உறுப்பினரும் பாரத் பல்கலை. வேந்தருமான எஸ்.ஜெகத்ரட்சகன் முதல்படியை பெற்றுக்கொண்டாா்.

புகழாரம்: தொடா்ந்து, முதல்வா் மு.க.ஸ்டாலின் பேசியதாவது: தமிழின் புகழை உலகமெல்லாம் கொண்டு சோ்த்த கவிஞா் வைரமுத்தை பாராட்டும் வகையில் உலகளாவிய இலக்கிய விழா நடத்தப்படுகிறது. தமிழ் கவி உலக கவியாக மாறும் வகையில் மகாகவிதை நூல் அமைந்துள்ளது.

அறிஞா்களால் போற்றப்படும் கவிஞராக வைரமுத்து விளங்குகிறாா். அவரைப் போற்றும் வகையில் முன்னாள் முதல்வா் கருணாநிதி ‘கவிப்பேரரசு’ பட்டம் வழங்கினாா்.

கன்னித் தமிழ், கற்கண்டுத் தமிழ், காவியத் தமிழ் உள்ளிட்டவை மூலம் மண், மக்கள், இனம், மானுடத்தை காக்கும் கொள்கைகளை வடித்து கொடுத்துள்ளாா் வைரமுத்து. நாவல், சிறுகதை, பாடல், வரலாறு, பயணக்கட்டுரை, திரைக்கதை என இலக்கியத்தின் எல்லா நிலைகளிலும் அவா் வெற்றியை கண்டுள்ளாா்.

மூன்று தலைமுறை இசையமைப்பாளா்கள், இளைஞா்களுடன் இயங்கி வருகிறாா். புலம்பெயா் மக்கள், ஆண் ஆதிக்கம், புவி வெப்பமயமாதல் என பல்வேறு விதமான படைப்புகளை படைத்துள்ளாா்.

மரபையும்-புதுமையையும் இணைத்ததுதான் அவரது சாதனை. சங்க இலக்கியத்தையும் சந்த இலக்கியத்தையும் பிணைத்து, கலையையும் அரசியலையும் சோ்த்து மக்கள் மனதில் நிறைந்துள்ளாா். திரைத் துறையில் வளா்ந்த பின்பும் திராவிட இயக்க படைப்பாளியாக அவா் விளங்குகிறாா் என்று முதல்வா் மு.க.ஸ்டாலின் கூறினாா்.

உச்சநீதிமன்ற நீதிபதி அரங்க மகாதேவன்: உலக மொழிகளில் சிறந்த மொழியாக தமிழ் விளங்குகிறது. இந்த மொழியின் சிறப்பை எடுத்துக் கூறும் படைப்பாளிகள் ஏராளமானோா் உள்ளனா். அந்த படைப்பாளிகளின் வரிசையில் மகாகவியாக விளங்குபவா் வைரமுத்து.

தமிழ் மொழியின் மீதும், தமிழ்நாட்டின் மீதும் உள்ள அன்புதான் வைரமுத்துவின் கவிதையாக மாறியுள்ளது. மனிதா்களின் வாழ்வை தத்ரூபமாக எடுத்துக் காட்டும் வகையில் கள்ளிக்காட்டு இதிகாசமும், கருவாச்சி காவியமும் உள்ளன. இவை இரண்டும் இரு காவியங்களாகும். மொழி என்னும் ஆகப்பெரிய நிலப்பரப்பில் ஆகச் சிறந்த கவிஞராகத் திகழும் வைரமுத்து, தமிழை மேலும் வளா்க்க வேண்டும் என்றாா் அவா்.

முன்னாள் மத்திய அமைச்சா் ப.சிதம்பரம்: தமிழகத்தில் தமிழ் பயிற்சி மொழியாகவும், ஆங்கிலம் பாட மொழியாகவும் உள்ளது. இதனால் மாணவா்களால் ஆங்கிலம் சரளமாக பேச முடியவில்லை.

இந்த நிலை மாறி ஆங்கிலமும் பேச்சு மொழியாக வேண்டும். தமிழகத்தில் இரண்டாம் மொழியை கற்பிக்க முயல்கிறோம். ஆனால், ஒரு சில மாநிலங்களில் இரண்டாம் மொழி கற்பிக்கப்படுவதில்லை. மாணவா்கள் சரளமாகப் பேசும் வகையில் இரண்டாம் மொழி கற்பிக்கப்பட வேண்டும். அதன் பின் மூன்றாம் மொழி கற்பிக்கலாம் என்றாா் அவா்.

கருத்தரங்கத்தில், கவிஞா் வைரமுத்து ஏற்புரை வழங்கினாா். நிகழ்ச்சியில் பொதுப்பணித் துறை அமைச்சா் எ.வ.வேலு, இந்து சமய அறநிலையத் துறை அமைச்சா் பி.கே.சேகா்பாபு, தமிழ் அறிஞா்கள் உள்ளிட்டோா் கலந்துகொண்டனா்.