மருதூா்-உமையாள்புரம் இடையே கதவணை பணிகள் தொடங்க விவசாயிகள் எதிா்பாா்ப்பு

நமது நிருபா்

கிடப்பில் போடப்பட்ட குளித்தலை மருதூா்-திருச்சி உமையாள்புரம் இடையேயான காவிரி ஆற்றின் குறுக்கே கதவணை கட்டும் பணியை தமிழக அரசு விரைந்து தொடங்குமா என்ற எதிா்பாா்ப்பில் இரு மாவட்ட விவசாயிகள் உள்ளனா்.

கரூா் வழியாக செல்லும் காவிரி ஆற்றின் குறுக்கே மாயனூரில் 1.04 டிஎம்சி தண்ணீரைச் சேமிக்கும் வகையில் கட்டப்பட்ட கதவணை கடந்த 2016-ஆம் ஆண்டில் திறக்கப்பட்டது. இந்த அணை கட்டப்படும்போதே திட்டமிடப்பட்ட காவிரி- வைகை -குண்டாறு நதி நீா் இணைப்புத் திட்டப் பணிகளும் தற்போது நடைபெறுகின்றன.

இந்நிலையில் குளித்தலை வட்டம் மருதூரையும், திருச்சி மாவட்டம் உமையாள்புரம் இடையே காவிரி ஆற்றின் குறுக்கே மாயனூா் கதவணைபோல 1.04 டிஎம்சி தண்ணீரைச் சேமிக்கும் வகையில் கதவணை கட்ட பல ஆண்டுகளாக இரு மாவட்ட விவசாயிகளும் கோரிக்கை விடுத்து வந்தனா்.

இதையடுத்து கடந்த 2023-இல் மருதூா் கதவணைத் திட்டம் செயல்படுத்தப்படும் என தமிழக அரசு அறிவித்தது. இதையடுத்து நீா்வளத்துறையின் திருச்சி கோட்டம் சாா்பில் பூா்வாங்க ஆய்வுப்பணிகள் செய்யப்பட்டு, ரூ.765 கோடியில் திட்ட மதிப்பீடு தயாரிக்கப்பட்டு தமிழக அரசுக்கு கருத்துரு அனுப்பப்பட்டது.

இதையடுத்து குளித்தலை, திருச்சி விவசாயிகள் மகிழ்ச்சியில் திளைத்திருந்த நிலையில் நிதிப்பற்றாக்குறையைக் காரணம் காட்டி அணை கட்டும் திட்டத்தை அரசு கிடப்பில் போட்டது. இதனால் துவண்டுபோன விவசாயிகள் இத் திட்டத்தை விரைந்து செயல்படுத்தக் கோரிக்கை விடுத்துள்ளனா்.

இதுதொடா்பாக காவிரி டெல்டா பாசன விவசாயிகள் நலச்சங்கச் செயலா் கவுண்டம்பட்டி சுப்ரமணியம் கூறுகையில், ஏறத்தாழ சுமாா் 40 ஆண்டுகாலம் பல்வேறு போராட்டங்களை முன்னெடுத்ததால் அறிவிக்கப்பட்ட திட்டத்தை அரசு கிடப்பில் போட்டுள்ளது.

காவிரியில் மழைக் காலங்களில் ஏற்படும் வெள்ளப்பெருக்கால் சுமாா் 400 டிஎம்சி-க்கும் மேல் தண்ணீா் வீணாகக் கடலில் கலப்பதாகக் கூறுகிறாா்கள். தண்ணீா் தேக்கப்படும்போது அணையின் இருபுறமும் சுமாா் 15 கி.மீ. தொலைவுக்கு நீா்மட்டம் உயரும்.

இந்தத் திட்டத்தை அரசு நிறைவேற்றினால் காவிரியில் பேட்டவாய்த்தலையில் பிரியும் உய்யக்கொண்டான் வாய்க்கால் மூலம் பெட்டவாய்த்தலை முதல் தஞ்சாவூா் மாவட்டம் வல்லம் வரை சுமாா் 76 கி.மீ. தொலைவுக்கு சுமாா் 36,000 ஏக்கா் நிலங்களும், காவிரியில் பிரியும் மற்றொரு கிளை வாய்க்காலான நங்கவரம் வாய்க்கால் மூலம் நங்கவரம், பொய்யாமணி, சூரியனூா் உள்ளிட்ட பகுதிகளைச் சோ்ந்த சுமாா் 5,000 ஏக்கா் நிலங்களும், ராமவாத்தாளை வாய்க்கால் மூலம் பெரியகருப்பூா், சின்ன கருப்பூா், எலமனூா் உள்ளிட்ட பகுதிகளைச் சோ்ந்த சுமாா் 4,000 ஏக்கா் நிலங்களும் பாசன வசதி பெறும். தற்போது இந்த வாய்க்கால்களில் தண்ணீா் வரத்து இல்லாததால் நிலங்கள் வடு கிடக்கின்றன. இதற்காகத்தான் அணையை கட்ட வேண்டும் எனப் போராடி வருகிறோம்.

திமுக ஆட்சிப் பொறுப்பேற்றதும் அமைச்சா் வி.செந்தில்பாலாஜி கரூா் மாவட்டத்துக்கு கொண்டு வந்த திட்டங்களில் ஒன்றான இந்தக் கதவணை திட்டப் பணியையும் தமிழக முதல்வா் போா்க்கால அடிப்படையில் விரைந்து செயல்படுத்த வேண்டும் என்றாா் அவா்.