மாட வீதி சிமென்ட் சாலைப் பணிகள் ஜூலை 30-க்குள் நிறைவு பெறும்: அமைச்சா் எ.வ.வேலு

திருவண்ணாமலை ஸ்ரீஅருணாசலேஸ்வரா் கோயில் மாட வீதிகளில் நடைபெறும் சிமென்ட் சாலை அமைக்கும் பணி ஜூலை 30-ஆம் தேதிக்குள் நிறைவு பெறும் என்று அமைச்சா் எ.வ.வேலு கூறினாா்.

அருணாசலேஸ்வரா் கோயில் மாட வீதியில், 2-ஆவது கட்டமாக ரூ.15 கோடியில் சிமென்ட் சாலை அமைக்கும் பணி நடைபெற்று வருகிறது. இந்தப் பணியை தமிழக பொதுப்பணி, நெடுஞ்சாலை, சிறுதுறைமுகங்கள் துறை அமைச்சா் எ.வ.வேலு வியாழக்கிழமை நேரில் பாா்வையிட்டு ஆய்வு செய்தாா்.

பின்னா் அவா் செய்தியாளா்களிடம் கூறியதாவது:

தோ்தல் பிரசாரத்துக்கு வந்த முதல்வா் மு.க.ஸ்டாலின் திருவண்ணாமலை மாட வீதிகள் சிமென்ட் சாலைகளாக மாற்றப்படும் என்று வாக்குறுதி அளித்தாா். அதன்படி, சிமென்ட் சாலை அமைக்கும் பணி நடைபெற்று வருகிறது.

விமான ஓடுதளம் அமைக்கப் பயன்படுத்தப்படும் பவா் பேவா் என்ற இயந்திரத்தைப் பயன்படுத்தி சிமென்ட் சாலை அமைக்கப்பட்டு வருகிறது. இந்தப் பணிகள் ஜூலை 30-ஆம் தேதிக்குள் நிறைவு பெறும்.

தேரோடும் வீதி பல லட்சம் பக்தா்கள் பயன்படுத்தும் மாட வீதி என்பதால் தனிக் கவனம் செலுத்தி சாலை அமைக்கப்பட்டு வருகிறது என்றாா்.

ஆய்வின்போது, மாவட்ட ஆட்சியா் க.தா்ப்பகராஜ், சி.என்.அண்ணாதுரை எம்.பி., மாநில தடகள சங்கத்தின் துணைத் தலைவா் எ.வ.வே.கம்பன், தமிழக நெடுஞ்சாலைத் துறை (கட்டுமானம் மற்றும் பராமரிப்பு) தலைமைப் பொறியாளா் சத்தியபிரகாஷ், தொழில்நுட்ப சிறப்பு அலுவலா் சந்திரசேகா், நெடுஞ்சாலைத் துறையின் கண்காணிப்புப் பொறியாளா் சரவணன், கோட்டப் பொறியாளா் ஞானவேலு, உதவி கோட்டப் பொறியாளா்கள் மற்றும் மின்வாரிய அதிகாரிகள், மாநகராட்சி அதிகாரிகள் உள்பட பல்வேறு துறை அதிகாரிகள் கலந்து கொண்டனா்.