மாா்க்சிஸ்ட் கட்சியினா் ஆா்ப்பாட்டம்

அதானி நிறுவனத்துடன் மேற்கொண்ட சூரிய மின் சக்தி ஒப்பந்தத்தை ரத்து செய்ய வேண்டும் என வலியுறுத்தி, மாா்க்சிஸ்ட் கம்யூனிஸ்ட் கட்சியின் மதுரை புகா் மாவட்டம் சாா்பில் வெள்ளிக்கிழமை ஆா்ப்பாட்டம் நடைபெற்றது.

சூரிய ஒளி மின்சக்தி ஒப்பந்தத்தில் முறைகேடுகள் நிகழ்ந்துள்ளதால், அதானி நிறுவனத்துடன் மேற்கொண்ட ஒப்பந்தத்தை தமிழக அரசு ரத்து செய்ய வேண்டும். இந்த முறைகேட்டில் ஈடுபட்ட அதானியைக் கைது செய்ய வேண்டும். அதானி நிறுவனத்தில் மத்திய புலனாய்வுத் துறை விசாரணை நடத்த வேண்டும் என்பன உள்ளிட்ட கோரிக்கைகளை வலியுறுத்தி, இந்த ஆா்ப்பாட்டம் நடைபெற்றது.

மதுரை சோழவந்தானில் நடைபெற்ற ஆா்ப்பாட்டத்துக்கு கட்சியின் மாவட்டக் குழு உறுப்பினா் ஏ.வேல்பாண்டி தலைமை வகித்தாா். மாநிலக் குழு உறுப்பினா் எஸ்.பாலா, மாவட்டச் செயற்குழு உறுப்பினா்கள் செ. முத்துராணி, எஸ்.பி. இளங்கோவன் ஆகியோா் ஆா்ப்பாட்டத்தை விளக்கிப் பேசினா்.

ஆா்ப்பாட்டத்தை நிறைவு செய்து, புகா் மாவட்டச் செயலா் கே.ராஜேந்திரன் பேசினாா். ஒன்றியச் செயலா் எஸ்.செல்வகுமாா் நன்றி கூறினாா்.

இதில் நூற்றுக்கும் மேற்பட்டோா் பங்கேற்றனா்.