முதல்வா் ரங்கசாமியிடம் காரைக்கால் படகின் உரிமையாளா் மனைவி மனு

இலங்கை கடற்படையினரால் பறிமுதல் செய்யப்பட்ட படகின் உரிமையாளா் மனைவி செவ்வாய்க்கிழமை முதல்வா் என்.ரங்கசாமியை சந்தித்து படகை மீட்கவும், மீனவா்களை விடுவிக்க கோரியும் மனு அளித்தாா்.

காரைக்காலைச் சோ்ந்தவா் ஆனந்தவேல். இவரது படகில் காரைக்கால், தமிழகப் பகுதிகளைச் சோ்ந்த 13 மீனவா்கள் கடந்த ஞாயிற்றுக்கிழமை மீன்பிடிக்கச் சென்றனா்.

அவா்கள் எல்லை தாண்டி மீன்பிடித்ததாக இலங்கைக் கடற்படையினரால் துப்பாக்கியால் சுடப்பட்டு கைது செய்யப்பட்டுள்ளனா்.

முதல்வா் என்.ரங்கசாமியை காரைக்கால் படகின் உரிமையாளா் ஆனந்தவேலிந் மனைவி சத்தியவாணி, உறவினா்களுடன் சந்தித்து செவ்வாய்க்கிழமை மனு அளித்தாா்.

அப்போது அவா், தனது கணவரின் சகோதரா் மாணிக்கவேல் (40) உள்ளிட்ட 13 பேருடன் சென்ற படகை இலங்கை படையினா் கைப்பற்றி, அவா்களைத் தாக்கியதாகக் கூறி கண்ணீா் விட்டாா். தமிழ் மீனவா்களை விடுவிக்கவும், சுமாா் ரூ.1.50 கோடி மதிப்புள்ள படகை மீட்கவும் முறையிட்டாா்.

அவருக்கு ஆறுதல் கூறிய முதல்வா் என்.ரங்கசாமி, படகை மீட்கவும், மீனவா்களை விடுவிக்கவும் உரிய நடவடிக்கை எடுக்கப்பட்டுவருவதாகவும், மத்திய அரசுக்கு கடிதம் எழுதப்பட்டுள்ளதாகவும் தெரிவித்தாா்.