முதல் அமைச்சரவைக் கூட்டத்தில் ரூ.2,500 நிதி உதவித் திட்டத்திற்கு ஒப்புதல் அளிக்காதது ஏன்?: தில்லி அரசுக்கு அதிஷி கேள்வி

தில்லி அரசு அதன் முதல் அமைச்சரவைக் கூட்டத்தில் நகரப் பெண்களுக்கு ரூ.2,500 நிசி உதவி வழங்கும் திட்டத்தை ஏன் நிறைவேற்றவில்லை என்று ஆம் ஆத்மி கட்சியின் மூத்தத் தலைவரும், கால்காஜி தொகுதி எம்எல்ஏவுமான அதிஷி வெள்ளிக்கிழமை கேள்வி எழுப்பியுள்ளாா்.

மேலும், புதிதாக பொறுப்பேற்றுள்ள பாஜக அரசு பிரதமா் நரேந்திர மோடியின் மகிளா சம்ரிதி யோஜனாவின் கீழ் பெண்களுக்கு நிதி உதவி வழங்குவதாக அளித்த வாக்குறுதியை நிறைவேற்றத் தவறிவிட்டது என்றும் அவா் குற்றம் சாட்டினாா்.

இது தொடா்பாக அவா் செய்தியாளா்களிடம் மேலும் கூறியதாவது;

தில்லி தோ்தலுக்கு முன்னா் பிரதமா் மோடியும், பாஜக தேசியத் தலைவா் ஜே.பி. நட்டாவும் தோ்தலில் வெற்றி பெற்றால் முதல் அமைச்சரவைக் கூட்டத்திலேயே மகளிருக்கான இந்தத் திட்டத்திற்கு ஒப்புதல் அளிக்கப்படும் என்றும், தில்லியில் உள்ள ஒவ்வொரு பெண்ணும் மாா்ச் 8 ஆம் தேதிக்குள் தங்கள் வங்கிக் கணக்கில் ரூ.2,500 பெறுவாா்கள் என்றும் உறுதியளித்திருந்தனா்.

வியாழக்கிழமை மாலை 7 மணிக்கு பாஜகவின் அமைச்சா்கள் பதவியேற்று அமைச்சரவைக் கூட்டத்தை நடத்தியபோது அத்தகைய திட்டம் எதுவும் நிறைவேற்றப்படவில்லை.

மோடியின் உத்தரவாதம் உண்மையானதாக இருந்தால், இந்தத் திட்டம் வியாழக்கிழமையே அங்கீகரிக்கப்பட்டிருக்க வேண்டும். ஆனால், புதிதாக நியமிக்கப்பட்டுள்ள முதல்வா் ரேகா குப்தா எடுத்த முதல் முடிவு அந்த வாக்குறுதியை துரோகம் செய்வதாக உள்ளது.

இந்த உதவித் தொகை எப்போது மகளிரின் கணக்குகளில் வரவு வைக்கப்படும்? இது மற்றொரு தோ்தல் தந்திரமா? என்று அவா் கேள்வி எழுப்பினாா்.

ஆம் ஆத்மி கட்சியும் பாஜகவும் தோ்தலுக்கு முன்னதாக பெண்களுக்கு மாதாந்திர நிதி உதவி அளிப்பதாக உறுதியளித்தன. மேலும் இது பிரசாரத்தின் போது அதிகம் விவாதிக்கப்பட்ட பிரச்னையாகவும் இருந்தது.

பிப்ரவரி 8-ஆம் தேதி தில்லியில் ஆம் ஆத்மி கட்சி ஆட்சியை இழந்த பிறகு மறுதினம், கட்சியின் தலைவா் அரவிந்த் கேஜரிவால் தனது இல்லத்தில் கட்சியின் புதிதாக தோ்ந்தெடுக்கப்பட்ட 22 எம்எல்ஏக்களை சந்தித்தாா்.

இக்கூட்டத்தைத் தொடா்ந்து, அதிஷி கூறுகையில், பாஜக அளித்த வாக்குறுதியின்படி, மாா்ச் 8 ஆம் தேதிக்குள் பெண்களுக்கு மாதம் ரூ.2,500 வழங்குவதையும், 300 யூனிட் இலவச மின்சாரம் வழங்குவதையும், மக்களுக்கு பிற வசதிகளைத் தொடா்வதையும் ஆம் ஆத்மி கட்சி உறுதி செய்யும் என்று தெரிவித்திருந்தாா்.

வெள்ளிக்கிழமை செய்தியாளா் சந்திப்பின்போது, வரும் சட்டப் பேரவைக் கூட்டத்தொடரில் 14 சிஏஜி அறிக்கைகளை தாக்கல் செய்வதற்கான புதிய அரசாங்கத்தின் முடிவு குறித்து செய்தியாளா்கள் கேட்டபோது, அதற்கு அதிஷி பதிலளிக்கையில், ‘அது ஒரு வழக்கமான பணியாகும். நான் முதல்வராக இருந்தபோது, சிஏஜி அறிக்கையை அப்போதைய பேரவைத் தலைவா் ராம் நிவாஸுக்கும் அனுப்பியிருந்தேன். இது செயல்முறையின் ஒரு பகுதியாகும்’ என்றாா் அவா்.

வியாழக்கிழமை நடைபெற் புதிதாக அமைக்கப்பட்ட தில்லி அமைச்சரவையின் முதல் கூட்டத்தில், தலைநகரில் ஆயுஷ்மான் பாரத் சுகாதார காப்பீட்டுத் திட்டத்தை செயல்படுத்த ஒப்புதல் அளிக்கப்பட்டது. மகிளா சம்ரிதி யோஜனா பற்றியும் விவாதிக்கப்பட்டது. மேலும் எட்டாவது சட்டப் பேரவையின் முதல் அமா்வில் நிலுவையில் உள்ள 14 சிஏஜி அறிக்கைகளை தாக்கல் செய்யவும் முடிவு செய்யப்பட்டது.