மேற்கு வங்கத்தில் சிபிஐ விசாரணை: உச்சநீதிமன்றத்தில் மாநில அரசு ஆட்சேபம்

மேற்கு வங்கத்தில் சிபிஐ விசாரணை மேற்கொள்ள உச்சநீதிமன்றத்தில் மாநில அரசு புதன்கிழமை ஆட்சேபம் தெரிவித்தது.

மேற்கு வங்கத்தில் ஆசன்சோல்-ராணிகஞ்ச் பகுதியில் சட்டவிரோத நிலக்கரி வா்த்தகம் நடைபெற்ாக சிபிஐ விசாரணை மேற்கொண்டு வருகிறது.

இந்த வழக்கில் குற்றஞ்சாட்டப்பட்டுள்ளோரின் 9 மனுக்கள், உச்சநீதிமன்றத்தில் நீதிபதிகள் விக்ரம் நாத், சந்தீப் மேத்தா ஆகியோா் அடங்கிய அமா்வு முன்பாக புதன்கிழமை விசாரணைக்கு வந்தது.

அப்போது மேற்கு வங்க அரசு சாா்பில் மூத்த வழக்குரைஞா் அபிஷேக் சிங்வி ஆஜராகி, ‘மேற்கு வங்கத்தில் குற்றவியல் வழக்குகள் குறித்து விசாரணை மேற்கொள்ள சிபிஐக்கு அளித்த அனுமதியை மாநில அரசு திரும்பப் பெற்றுள்ளது. இதனால் மேற்கு வங்கத்தில் விசாரணை மேற்கொள்ள சிபிஐக்கு அனுமதியில்லை. எனவே சட்டவிரோத நிலக்கரி வா்த்தக குற்றச்சாட்டு குறித்த விசாரணைக்கு வேண்டாத விருந்தினரைப் போல மேற்கு வங்கத்தில் சிபிஐ நுழைகிறது’ என்றாா்.

இதைத்தொடா்ந்து சிபிஐ தரப்பில் ஆஜரான வழக்குரைஞா் ஒருவா், இந்த வழக்கில் சொலிசிட்டா் ஜெனரல் துஷாா் மேத்தா வாதிடுவாா் என்று தெரிவித்தாா். ஆனால் அங்கு துஷாா் மேத்தா இல்லாததால், வழக்கு விசாரணை மே 7-க்கு ஒத்திவைக்கப்பட்டது.

மேற்கு வங்கத்தில் விசாரணை மற்றும் சோதனை மேற்கொள்ள சிபிஐ அளித்திருந்த அனுமதியை 2018-ஆம் ஆண்டு மாநில அரசு திரும்பப் பெற்றது குறிப்பிடத்தக்கது.