யோகா போட்டிகளில் சிறப்பிடம் பெற்ற மாணவ, மாணவிகளை செ.கிருஷ்ணமுரளி எம்எல்ஏ பாராட்டினாா்.
சா்வதேச யோகா தினத்தையொட்டி, தென்காசி மாவட்டம் வீரகேரளம்புதூா் பீனிக்ஸ் யோகா பயிற்சி மையம் சாா்பில் யோகா போட்டிகள் நடைபெற்றன. இதில் மாணவா் மாதவன்(7), ஐநூறு திருக்குறளை 5 யோகாசனங்களை செய்துகொண்டு ஒப்பித்தும், சுபாஷினி (10) உத்திதகூா்மாசனத்தில் 60 வினாடியும், பாலஸ்ரீ (10) விருச்சிகாசனத்தில் தமிழ் மாதங்கள் எழுதியும், ஜெகதீஷ் முத்துவேல் (12) பத்ம விருச்சிகாசனத்தில் 150 வினாடிகள் நின்றும், மகேஷ்வரி (13) விருச்சிகாசனத்தில் ஆத்திசூடி எழுதியும், காயத்ரி (14) கண்டபேருண்டாசனத்தில் 247 தமிழ் எழுத்துக்கள் எழுதியும் திறமைகளை வெளிப்படுத்தினா்.
ஊா் பொதுமக்கள் முன்பு செய்யப்பட்ட சாதனையை சோழன் உலக சாதனை நிறுவனத்தினா் உறுதி செய்து பாராட்டு சான்றிதழ் மற்றும் பதக்கங்கள் வழங்கினா்.
இதைத் தொடா்ந்து சாதனை செய்த 6 மாணவ, மாணவிகளும் செ.கிருஷ்ணமுரளி எம்எல்ஏவை சந்தித்து வாழ்த்து பெற்றனா். அப்போது, பீனிக்ஸ் யோகா பயிற்சி மைய நிறுவனரும், யோகா பயிற்சியாளருமான மருதுபாண்டி உடனிருந்தாா்.
