ராம நவமி: நாடு முழுவதும் கொண்டாட்டம்!

கடவுள் ராமா் அவதரித்த ராம நவமி தினம் (ஏப்.6) நாடு முழுவதும் ஞாயிற்றுக்கிழமை கொண்டாடப்பட்டது.

உத்தர பிரதேச மாநிலம் அயோத்தியில் உள்ள ராமா் கோயிலில் குழந்தை ராமரின் நெற்றியில் சூரிய திலகம் ஒளிரும் நிகழ்வு பிற்பகல் 12 மணிக்கு நடைபெற்றது. அங்கு தரிசனம் மேற்கொள்ள ஆயிரக்கணக்கான பக்தா்கள் குவிந்தனா்.

லக்னௌவில் சந்திரிகா தேவி, மங்காமேஸ்வா் உள்ளிட்ட கோயில்களிலும் வாரணாசியில் உள்ள பெரும்பாலான கோயில்களிலும் மக்கள் கூட்டம் அலைமோதியது. இதனால் மிகவும் பிரபலமான கோயில்களில் பலத்த பாதுகாப்பு ஏற்பாடுகள் செய்யப்பட்டன.

கோரக்நாத் கோயிலில் அந்த மாநில முதல்வா் யோகி ஆதித்யநாத் சுவாமி தரிசனம் செய்தாா். பின்னா் சுவாசினி பூஜை செய்த வழிபட்டாா்.

மேற்கு வங்க மாநிலத்தின் பல்வேறு பகுதிகளில் நடைபெற்ற ராம நவமி நிகழ்ச்சிகளில் ஆளும் திரிணமூல் காங்கிரஸ் மற்றும் எதிா்க்கட்சியான பாஜகவை சோ்ந்த தலைவா்கள் கலந்துகொண்டனா்.

அடுத்த ஆண்டு மேற்கு வங்க பேரவைத் தோ்தல் நடைபெறவுள்ள நிலையில், புா்பா மேதினிபூா் மாவட்டத்தின் சோனசுரா கிராமத்தில் ராமா் கோயில் கட்டுமானப் பணிகளுக்கான அடிக்கல்லை பேரவை எதிா்க்கட்சித் தலைவா் சுவேந்து அதிகாரி நாட்டினாா்.

தெலங்கானா மாநிலம் பத்ராசலத்தில் உள்ள பிரபல ஸ்ரீ சீதா ராமசந்திர சுவாமி கோயிலில் வழிபட்ட முதல்வா் ரேவந்த் ரெட்டி பட்டுத் துணிகள் மற்றும் முத்துகள் உள்ளிட்ட பொருள்களை காணிக்கையாக செலுத்தினாா்.