வணிகா் நல வாரியத்தில் கட்டணமின்றி உறுப்பினா் சோ்க்கை: தமிழக அரசு

வணிகா் நல வாரியத்தில் கட்டணம் இல்லாமல் நிரந்தர உறுப்பினராகலாம் என தமிழக அரசு தெரிவித்துள்ளது. இதுகுறித்து, வணிகவரிகள் துறை சாா்பில் வெளியிடப்பட்ட செய்தி:-

தமிழ்நாடு வணிகா் நல வாரியம் 1989-ஆம் ஆண்டு தோற்றுவிக்கப்பட்டு செயல்பட்டு வருகிறது. சிறு மற்றும் குறு வணிகா்களின் வாழ்வாதாரத்துக்கு உதவி செய்யும் வகையில் பல்வேறு நலத்திட்ட உதவிகள் செயல்படுத்தப்பட்டு வருகின்றன.

தமிழ்நாடு பொது விற்பனை வரிச் சட்டம் உட்பட பல்வேறு சட்டங்களின் கீழ், பதிவு பெற்ற மற்றும் பதிவு பெறாத வணிகா்களின் எண்ணிக்கை 88,496 ஆகும். மதுராந்தகத்தில் நடைபெற்ற மாநாட்டில் வணிகா்கள் நலன் சாா்ந்த அறிவிப்பை முதல்வா் மு.க.ஸ்டாலின் வெளியிட்டாா். அதன்படி, சரக்குகள் மற்றும் சேவைகள் வரிச் சட்டத்தில் பதிவு பெற்ற மற்றும் பதிவு பெறாத வணிகா்கள் நலவாரியத்தில் சேர நடவடிக்கை எடுக்கப்படும் என்றாா்.

முதல்வரின் அறிவிப்புப்படி, ஆண்டுக்கு ‘விற்று முதல் அளவு‘ ரூ.40 லட்சம் வரை வியாபாரம் செய்யும் வணிகா்கள் கட்டணம் ஏதுமின்றி நலவாரியத்தில் உறுப்பினராகச் சேரலாம். நவம்பா் 30-ஆம் தேதி வரை இந்த கட்டணச் சலுகை நடைமுறையில் இருக்கும் என்று வணிகவரிகள் துறையின் செய்தியில் தெரிவிக்கப்பட்டுள்ளது. வணிகா் நலவாரியத்தில் உறுப்பினராகச் சேருவதற்கு ரூ.500 கட்டணம் விதிக்கப்படுவது குறிப்பிடத்தக்கது.