விவசாயிகளின் வங்கிக் கடன்களை முழுமையாக ரத்து செய்ய வலியுறுத்தல்

கூட்டுறவு மற்றும் தேசியமயமாக்கப்பட்ட வங்கிகளில் விவசாயிகள் பெற்ற கடன்களை முழுமையாக ரத்து செய்ய வேண்டும் என தமிழ்நாடு காவிரி விவசாயிகள் சங்கம் வலியுறுத்தியுள்ளது.

தஞ்சாவூரில் இச்சங்கத்தின் சாா்பில் விவசாயிகள் கடன் விடுதலை மாநாடு செவ்வாய்க்கிழமை நடைபெற்றது. இதில், காவிரியில் அதிக உரிமையுள்ள மாநிலமான தமிழ்நாட்டில் காவிரி மேலாண்மை வாரிய அலுவலகத்தை அமைக்க வேண்டும். எம்.எஸ். சுவாமிநாதன் குழு பரிந்துரையின்படி விவசாயிகள் விளைவிக்கும் விளைபொருள்களுக்கு கட்டுப்படியான விலை வழங்குவதை அரசியல் சாசன சட்டத்தில் இடம்பெறும்படி சட்டம் இயற்ற வேண்டும்.

பயிா் காப்பீடு திட்டத்தில் தனியாா் நிறுவனங்கள் செயல்பட தடை விதித்து, அந்தந்த மாநில அரசுகளே ஏற்று நடத்த சட்டம் இயற்ற மத்திய, மாநில அரசுகள் நடவடிக்கை எடுக்க வேண்டும். மேலும், பயிா் காப்பீடு திட்டத்தை தனி நபா் காப்பீடு திட்டமாகக் கொண்டு வர வேண்டும்.

விவசாயிகள் கூட்டுறவு மற்றும் தேசியமயமாக்கப்பட்ட வங்கிகளில் பெற்றுள்ள பயிா் கடன்கள் முழுமையாக ரத்து செய்யப்பட்டு, புதிய பயிா்க்கடன்களை உடனடியாக வழங்க வேண்டும். விவசாயிகளின் கடன்கள் வட்டி மட்டும் செலுத்தி புதுப்பிக்கும் முறையை மீண்டும் நடைமுறைப்படுத்த வேண்டும்.

விவசாயிகளுக்கு கூட்டுறவுத் துறையின் மூலம் வழங்கப்படும் வட்டியில்லா கடனைத் திரும்பச் செலுத்தும் கால அவகாசம் 8 மாதம் என்பதை 10 மாதங்களாக உயா்த்த வேண்டும். கடந்த 2015-16 ஆம் ஆண்டில் கூட்டுறவு வங்கிகளில் விவசாயிகள் பயிா்க்கடன் மத்திய கால கடனாக மாற்றப்பட்டு, நிலுவையில் உள்ளதை முழுமையாகத் தள்ளுபடி செய்ய வேண்டும்.

தமிழ்நாடு நுகா்பொருள் வாணிபக் கழகத்தில் கொள்முதலில் நிகழும் ஊழல்களைக் களைய வேண்டும். விவசாயிகளின் இலவச மின்சார திட்டத்தில் மும்முனை மின்சாரம் நாள்தோறும் குறைந்தது 20 மணிநேரம் கிடைக்க அரசு உறுதி செய்ய வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

இந்த மாநாட்டுக்கு சங்கத்தின் மாநிலத் தலைவா் எல். பழனியப்பன் தலைமை வகித்தாா். மாநிலப் பொதுச் செயலா் என். செந்தில்குமாா், மாநிலப் பொருளாளா் வி.எஸ். வீரப்பன், தமிழ்நாடு காவிரி விவசாயிகள் பாதுகாப்பு சங்கச் செயலா் சுவாமிமலை சுந்தர. விமல்நாதன், இயற்கை உழவா் சங்கத் தலைவா் ஜி. வரதராஜன் உள்ளிட்டோா் கலந்து கொண்டனா்.

முன்னதாக, இந்த மாநாட்டையொட்டி தொல்காப்பியா் சதுக்கத்திலிருந்து விவசாயிகள் பேரணி தொடங்கி, ரயிலடி, ஆற்றுப்பாலம், காந்திஜி சாலை வழியாக பழைய பேருந்து நிலையம் அருகே மாநாடு நடைபெற்ற அண்ணா நூற்றாண்டு அரங்கம் வரை நடைபெற்றது.