வீட்டில் வைக்கப்பட்ட எலி மருந்தின் நெடி பரவி இரு குழந்தைகள் உயிரிழப்பு: தனியாா் நிறுவன ஊழியா்கள் 2 போ் கைது

குன்றத்தூா் அருகே வீட்டில் எலிகளைக் கட்டுப்படுத்த வைக்கப்பட்ட மருந்தின் நெடி பரவி குழந்தைகள் இருவா் உயிரிழந்த சம்பவம் தொடா்பாக, தனியாா் நிறுவன ஊழியா்கள் 2 பேரை குன்றத்தூா் போலீஸாா் கைது செய்து விசாரித்து வருகின்றனா்.

குன்றத்தூா் அடுத்த மணஞ்சேரி பகுதியைச் சோ்ந்தவா் கிரிதரன். குன்றத்தூரில் உள்ள தனியாா் வங்கியில் மேலாளராகப் பணிபுரிந்து வருகிறாா். இவரது மனைவி பவித்ரா. தம்பதிக்கு மகள் விசாலினி (6), மகன் சாய் சுதா்சன் (1) என இரு குழந்தைகள்.

அடுக்குமாடி குடியிருப்பில் வசித்து வந்த கிரிதரனின் வீட்டில் எலிகளின் தொல்லை அதிகமாக இருந்ததால், தனியாா் நிறுவனத்தைத் தொடா்பு கொண்டு வீட்டில் எலி மருந்து வைக்க கூறியுள்ளாா்.

இதையடுத்து கிரிதரன் வீட்டுக்கு வந்த தனியாா் நிறுவன ஊழியா்கள் இருவா், வீட்டில் கரையான் மருந்தைத் தெளித்துவிட்டு, வீட்டின் கூடம் மற்றும் சமையல் அறைகளில் 12 இடங்களில் எலி மருந்தை வைத்துவிட்டுச் சென்றுள்ளனா்.

இந்த நிலையில், எலிகளை ஒழிக்க வைக்கப்பட்ட மருந்தின் நெடியால் கிரிதரன், அவரது மனைவி பவித்ரா, குழந்தைகள் விசாலினி, சாய் சுதா்சன் ஆகிய 4 பேருக்கும் வாந்தி, மயக்கம் ஏற்பட்டது. அவா்கள் உடனடியாக மருத்துவமனையில் அனுமதிக்கப்பட்டனா்.

இந்த நிலையில், குழந்தைகள் விசாலினி, சாய் சுதா்சன் இருவரும் உயிரிழந்தனா். கிரிதரன், பவித்ரா இருவரும் தனியாா் மருத்துவமனையில் சிகிச்சை பெற்று வருகின்றனா்.

இந்த சம்பவம் குறித்து குன்றத்தூா் போலீஸாா் வழக்குப் பதிவு செய்து எலி மருந்து வைத்த தனியாா் நிறுவன ஊழியா்கள் தினகரன் (43), சங்கா் தாஸ் (36) ஆகிய இருவரை கைது செய்தனா். மேலும், தலைமறைவாக உள்ள தனியாா் நிறுவன உரிமையாளா் பிரேம்குமாரை தனிப்படை அமைத்துத் தேடி வருகின்றனா்.

எலி மருந்தின் நெடியால் குழந்தைகள் உயிரிழந்ததைத் தொடா்ந்து, தடயவியல் நிபுணா்கள் வீட்டில் வைக்கப்பட்டிருந்த எலி மருந்தை பரிசோதனைக்காக எடுத்துச் சென்றனா்.

வீட்டின் கூடம், சமையல் அறை என 3 இடங்களுக்குப் பதிலாக 12 இடங்களில் அளவுக்கு அதிகமான எலி மருந்தை ஊழியா்கள் வைத்துவிட்டுச் சென்றதுதான் உயிரிழப்புக்கு காரணம் என போலீஸாா் தெரிவித்தனா்.