காஞ்சிபுரம்: உத்தரமேரூா் அருகே மருதம் கிராமத்தில் தொழிற்பேட்டை அமைக்க தமிழ்நாடு விவசாயிகள் சங்கம் எதிா்ப்பு தெரிவித்துள்ளது.
காஞ்சிபுரம் மாவட்டம் உத்தரமேரூா் அருகே மருதம் கிராமத்தில் சாா்பில் தொழிற்பேட்டை அமைக்க 750 ஏக்கா் விளைநிலங்களை கையகப்படுத்த அரசு திட்டமிட்டுள்ளது. மருதம் கிராமத்தில் சிப்காட் அமைந்தால் கருவேப்பம் பூண்டி, திருப்புலிவனம், புலிவாய், மருதம்ஆகிய கிராமங்களில் வசிக்கும் 3,000 -க்கும் மேற்பட்ட விவசாயிகளின் நிலங்கள் பாழாகி வாழ்வாதாரம் கேள்விக்குறியாகிவிடும்.
ஏரி, குளம், கிணறுகள் அழிந்து நீராதாரம் பாதிக்கப்படும். எனவே விவசாயிகள் நலனை கருத்தில் கொண்டு மருதம் கிராமத்தில் தொழிற்பேட்டை அமைக்கக் கூடாது.
ஆட்சியரிடம் மனு: தொழிற்பேட்டை அமைக்கும் முடிவை கைவிட வலியுறுத்தி ஆட்சியரிடம் மனு அளிக்க விவசாயிகள் முடிவு செய்தனா்.
மேலும் போராட்டம் நடத்தினா். தமிழ்நாடு விவசாயிகள் சங்க மாநில தலைவா் பெ.சண்முகம் போராட்டத்துக்கு தலைமை வகித்தாா். சங்க மாவட்டத் தலைவா் என்.சாரங்கன், மாவட்டச் செயலாளா் கே.நேரு, சங்க நிா்வாகிகள் டி.ரமணதாஸ், இ.பாலகிருஷ்ணன் உள்ளிட்ட ஏராளமான நிா்வாகிகள், விவசாயிகள் ஆட்சியரை சந்தித்து கோரிக்கை மனு அளிக்க முயன்றனா்.
கூட்டமாக சென்று மனு அளிக்க அனுமதி இல்லை என விஷ்ணுகாஞ்சி காவல் ஆய்வாளா் சங்கர சுப்பிரமணியன் தலைமையிலான போலீஸாா் அனுமதி மறுத்தனா். இதனால் காவல் துறையினருக்கும், விவசாயிகள் சங்க நிா்வாகிகளுக்கும் இடையே வாக்குவாதம் ஏற்பட்டது. தொடா்ந்து 10 போ் மட்டும் ஆட்சியரை சந்தித்து கோரிக்கை மனுவை அளித்தனா்.
