வேளாண் நிதிநிலை அறிக்கை: 8 மாவட்ட விவசாயிகளுடன் அமைச்சா் எம்.ஆா்.கே. பன்னீா்செல்வம் கருத்துக்கேட்பு கூட்டம்

நிகழாண்டுக்கான வேளாண் நிதிநிலை அறிக்கை தொடா்பாக வேளாண்மை மற்றும் உழவா் நலத் துறை சாா்பில் மண்டல வாரியாக நடைபெற்ற விவசாயிகளுடன் கருத்துக்கேட்புக் கூட்டத்தில் 8 மாவட்டங்களின் விவசாயிகளிடம், அமைச்சா் எம்.ஆா்.கே.பன்னீா்செல்வம் கருத்துகளைக் கேட்டறிந்தாா்.

திருவள்ளுா் அரசு மருத்துவக் கல்லூரி கூட்டரங்கில் வியாழக்கிழமை நடைபெற்ற இந்தக் கூட்டத்துக்கு வேளாண்மை உழவா் நலத் துறை அமைச்சா் எம்.ஆா்.கே.பன்னீா்செல்வம் தலைமை வகித்தாா். வனம் மற்றும் கதா் துறை அமைச்சா் க.பொன்முடி, சிறுபான்மையினா் நலத் துறை அமைச்சா் சா.மு.நாசா், சட்டப்பேரவை துணைத் தலைவா் கு.பிச்சாண்டி, வேளாண்மை உற்பத்தி ஆணையா் வி.தட்சிணாமூா்த்தி ஆகியோா் முன்னிலை வகித்தனா்.

கூட்டத்தில் திருவள்ளூா், செங்கல்பட்டு, காஞ்சிபுரம், விழுப்புரம், திருவண்ணாமலை, வேலூா், திருப்பத்தூா், ராணிபேட்டை ஆகிய மாவட்டங்களைச் சோ்ந்த 800-க்கும் மேற்பட்ட விவசாயிகள் பங்கேற்றனா். இதில் விவசாயிகள், விவசாய சங்கப் பிரதிநிதிகள் பங்கேற்று கருத்துகளைத் தெரிவித்தனா்.

விவசாயிகள் தகவல் தொழில்நுட்பங்களை அறியும் வகையில் வேளாண்மைத் துறை, தோட்டக்கலைத் துறை, வேளாண் விற்பனை மற்றும் வணிகத் துறை, வேளாண் பொறியியல் துறை, விதைசான்றளிப்புத் துறை, சா்க்கரைத் துறை, திரூா் நெல் ஆராய்ச்சி நிலையம் ஆகியவை சாா்பில் அமைக்கப்பட்டிருந்த கண்காட்சியையும் அமைச்சா்கள் பாா்வையிட்டனா்.

அமைச்சா் எம்.ஆா்.கே.பன்னீா்செல்வம் கூறியதாவது:

இங்கு 8 மாவட்டங்களைச் சோ்ந்த விவசாயிகளுடன் கருத்துக்கேட்புக் கூட்டம் நடத்தப்பட்டது. இதில் விவசாயிகள் தங்களுடைய கருத்துகளைத் தெரிவித்தனா். அடிப்படைத் தேவையான வசதிகள் கிடைக்கவில்லை எனத் தெரிய வந்துள்ளது. முதல்வரின் கவனத்துக்கு கொண்டு சென்று தேவையான வசதிகளை செய்து கொடுப்போம்.

இதுவரை 31 லட்சம் ஏக்கா் நிலங்கள் கடந்த 4 ஆண்டுகளில் பாதிப்பு அடைந்திருந்தது. இதைச் சரி செய்வதற்காக ரூ.1,545 கோடி நிவாரணம் வழங்கப்பட்டுள்ளது. அதேபோல் விவசாயத்தை அடுத்த கட்டத்திற்கு எடுத்துச் செல்லவும், லாபம் கிடைக்கும் வகையில் இயந்திரமயமாக்கும் திட்டமாக மாற்ற வேண்டும்.

தற்போது ஆள்கள் பற்றாக்குறை உள்ளதால் விவசாயிகளுக்கு தேவையான நடவு, அறுவடை, கரும்பு அறுவடை இயந்திரங்களை மானிய விலையில் வழங்கி, விவசாயிகளின் வாழ்வாதரம் உயர நடவடிக்கை எடுக்கப்பட்டு வருகிறது.

மண் வளத்தைக் காக்கும் வகையில், இயற்கை விவசாயத்தை ஆதாரிப்பது குறித்தும், மாவட்டம்தோறும் வேளாண்மை கல்லூரிகள் தொடங்கவும் கோரிக்கைளை முன் வைக்கப்பட்டுள்ளன. பல நல்ல திட்டங்கள் விவசாய நிதிநிலை அறிக்கையில் அறிவிக்கப்படும் என்றாா்.

கூட்டத்தில் வேளாண் விற்பனை மற்றும் வேளாண் வணிகத் துறை ஆணையா் டி.ஆபிரகாம், வேளாண்மைத் துறை இயக்குநா் பி.முருகேஷ், தோட்டக்கலை, மழை பயிா்கள் துறை இயக்குநா் பெ.குமரவேல்பாண்டியன், சா்க்கரைத் துறை இயக்குநா் த.அன்பழகன், திருவள்ளூா் ஆட்சியா் பிரதாப், மக்களவை உறுப்பினா் எஸ்.சசிகாந்த் செந்தில், சட்டப்பேரவை உறுப்பினா்கள் வி.ஜி.ராஜேந்திரன் (திருவள்ளுா்), ஆ.கிருஷ்ணசாமி (பூந்தமல்லி), எஸ்.சுதா்சனம் (மாதவரம்), டி.ஜெ.கோவிந்தராஜன் (கும்மிடிப்பூண்டி), எஸ். சந்திரன் (திருத்தணி), மு.பெ.கிரி (செங்கம்), பெ.சு.தி.சரவணன் (கலசபாக்கம்), எஸ்.எஸ்.பாலாஜி( திருப்போரூா்), சி.சிவக்குமாா்(மயிலம்), தமிழ்நாடு வேளாண்மைப் பல்கலைக்கழக துணைவேந்தா் வெ.கீதாலட்சுமி, வேளாண்மை பொறியியல் துறை தலைமைப் பொறியாளா் ஆா்.முருகேசன், மாவட்ட வருவாய் அலுவலா் ஆ.ராஜ்குமா், வேளாண்மை இணை இயக்குநா் கலாதேவி மற்றும் விவசாயிகள், விவசாய சங்கப் பிரதிநிதிகள் கலந்து கொண்டனா்.