ஸ்ரீரங்கத்தில் ரௌடி செவ்வாய்க்கிழமை வெட்டிக் கொல்லப்பட்ட வழக்கில் 8 பேரை போலீஸாா் புதன்கிழமை கைது செய்தனா்.
ஸ்ரீரங்கம் தெப்பக்குளத் தெருவில் செவ்வாய்க்கிழமை காலை அப்பகுதியைச் சோ்ந்த ரெளடி அன்பு (எ) அன்பரசனை 8 போ் கொண்ட கும்பல் ஓட ஓட விரட்டி வெட்டிக் கொன்றது.
இதுகுறித்து ஸ்ரீரங்கம் போலீஸாா் வழக்கு பதிந்த நிலையில், கொலை கும்பலை பிடிக்க அமைக்கப்பட்ட தனிப்படையினா் ஸ்ரீரங்கம் மேலூா் மூலத்தோப்பை சோ்ந்த கி. தினேஷ்பாபு (28), திருவானைக்கா வடக்கு 5 ஆம் பிரகாரம் ர. ரகுபதி (22), ஸ்ரீரங்கம் தெப்பக்குளத்தெரு 2 வது தெரு பா. மகாபிரபு (23), கோபால் (21), மேலூா் கொள்ளிடக்கரை ச. அய்யனாா் (22), சென்னை காசிமேடு கு. லோகேஷ் (23), ஸ்ரீரங்கம் தெப்பக்குளத்தெரு தீபக்ராகுல் (22), சச்சின் விஜய் (21) ஆகிய 8 பேரை புதன்கிழமை கைது செய்தனா்.
முன்விரோதத்தால் கொலை: இவா்களிடம் நடத்திய முதல்கட்ட விசாரணையில் நெடுங்கூா் பகுதியில் சேவல் சண்டை நடத்துவது தொடா்பாக ஸ்ரீரங்கம் பகுதியில் உள்ள ரெளடி திலீப் என்பவரிடம் தினேஷ்பாபு பேசியபோது அங்கிருந்த அன்பு (எ) அன்பரசன் சேவல் சண்டை நடத்தக் கூடாது எனக் கூறினாராம். அதற்கு நாங்கள் நடத்துவோம் என்று தினேஷ்பாபு கூறவே, என்னையா எதிா்த்துப் பேசுகிறாய் எனக் கூறிய அன்பு அவரை அடித்து மண்டிபோட வைத்தாராம். இதில் அவமானப்பட்ட தினேஷ்பாபு அன்புவைக் கொல்லாமல் விடமாட்டேன் என்று திலீப்பிடம் கூறிச் சென்றாராம்.
இதையடுத்து ஏற்கெனவே ரெளடி அன்பரசனால் பாதிக்கப்பட்ட சென்னை லோகேஷுடன் இணைந்து திட்டமிட்டு நண்பா்களுடன் சோ்ந்து தினேஷ்பாபு இந்தக் கொலையை அரங்கேற்றியதாகத் தெரியவந்துள்ளது.
