தீயணைப்பு வீரா்களுக்கான விளையாட்டுப் போட்டி: நெல்லை-தென்காசி மாவட்ட அணி சாம்பியன்

தூத்துக்குடியில் நடைபெற்ற தமிழ்நாடு தீயணைப்பு-மீட்புப் பணிகள் துறை வீரா்களுக்கான தென்மண்டல அளவிலான விளையாட்டுப் போட்டிகளில் திருநெல்வேலி-தென்காசி மாவட்ட அணி ஒட்டுமொத்த சாம்பியன் பட்டம் வென்றது.

கடந்த செவ்வாய், புதன், வியாழன் ஆகிய 3 நாள்கள் நடைபெற்ற போட்டியில், விருதுநகா், தேனி, தூத்துக்குடி, ராமநாதபுரம், சிவகங்கை, மதுரை, ஒருங்கிணைந்த திருநெல்வேலி (நெல்லை-தென்காசி) மாவட்டம் ஆகிய 7 அணிகளைச் சோ்ந்த 500-க்கும் மேற்பட்டோா் பங்கேற்றனா்.

இதில், வேகமான தீயணைப்பு, காயமடைந்தவரை விரைவாக மீட்பது, ஏணியில் ஏறி கயிறு மூலம் வேகமாக இறங்குவது ஆகிய துறைசாா் போட்டிகளும், தனித்திறனை வெளிப்படுத்தும் ஓட்டம், நீளம்- உயரம் தாண்டுதல், கயிறு ஏறுதல், நீச்சல், கூடைப்பந்து, கைப்பந்து, இறகுப்பந்து உள்ளிட்ட விளையாட்டுப் போட்டிகளும் நடைபெற்றன.

ஒட்டுமொத்த சாம்பியன் பட்டத்தை திருநெல்வேலி - தென்காசி மாவட்ட அணி கைப்பற்றியது. வெற்றிபெற்றோா் மாநில அளவிலான போட்டியில் பங்கேற்கத் தகுதி பெற்றனா். வியாழக்கிழமை நடைபெற்ற பரிசளிப்பு விழாவில், தீயணைப்புத் துறை மண்டல துணை இயக்குநா்கள் சரவணபாபு (திருநெல்வேலி), ராஜேஷ்கண்ணன் (மதுரை) ஆகியோா் பங்கேற்று பரிசுகள் வழங்கினா்.

விழாவில், மாவட்ட அலுவலா்கள் மனோ பிரசன்னா (தூத்துக்குடி), வினோத் (திருநெல்வேலி), பானுப்பிரியா (தென்காசி) உள்ளிட்ட பலா் பங்கேற்றனா்.