புதுக்கோட்டை சமூக ஆா்வலா் கொலை வழக்கு: இன்று சடலத்தைத் தோண்டி எக்ஸ்ரே எடுக்க உத்தரவு

புதுக்கோட்டை சமூக ஆா்வலா் ஜகபா் அலி கொலை செய்யப்பட்டது தொடா்பான வழக்கில், அவரது சடலத்தை வெள்ளிக்கிழமை (ஜன. 31) தோண்டி எடுத்து, எக்ஸ்ரே எடுக்க வேண்டும் என சென்னை உயா்நீதிமன்ற மதுரை அமா்வு வியாழக்கிழமை உத்தரவிட்டது.

புதுக்கோட்டை மாவட்டம், வெங்களூரைச் சோ்ந்த மரியம் சென்னை உயா்நீதிமன்ற மதுரை அமா்வில் தாக்கல் செய்த மனு:

சமூக ஆா்வலரான எனது கணவா் ஜாபா் அலி, கடந்த 17-ஆம் தேதி காட்டுபாபா பள்ளிவாசலில் தொழுகை முடித்து வெளியில் வந்தாா். அப்போது, அவா் மீது லாரியை மோதச் செய்து கொலை செய்தனா்.

புதுக்கோட்டை மாவட்டத்தில் சட்டவிரோத குவாரிகளுக்கு எதிராகப் பல்வேறு போராட்டங்களை ஜகபா் அலி நடத்தியுள்ளாா். இந்த குவாரிகளால் அரசுக்கு ரூ. 840 கோடி வரை இழப்பு ஏற்பட்டுள்ளது.

எனவே, சம்பந்தப்பட்ட குவாரி உரிமையாளா்கள் மீது நடவடிக்கை எடுக்க வலியுறுத்தி, போராட்டத்துக்கு அறிவிப்பு வெளியிட்டிருந்தாா்.

இந்த நிலையில், எனது கணவரை சமூக விரோதிகள் லாரி ஏற்றிக் கொலை செய்து விட்டனா். எனது கணவரின் சடலத்தை கடந்த 18-ஆம் தேதி கூறாய்வு செய்தனா். இதை விடியோ பதிவு செய்யக் கோரிய எங்களது கோரிக்கை நிராகரிக்கப்பட்டது. ஆனால், பிரேத பரிசோதனை அறிக்கையைத் தராமல் 10 நாள்கள் கால தாமதப்படுத்தினா். எனது கணவரின் சடலம் உரிய விதிகளைப் பின்பற்றி கூறாய்வு செய்யப்படவில்லை.

இந்த வழக்கு சிபிசிஐடிக்கு மாற்றப்பட்டாலும், அவா்கள் முதல் தகவல் அறிக்கையை எங்களுக்கு வழங்கவில்லை. 20 கி.மீ. தொலைவில் தடய அறிவியல் பரிசோதனை செய்வதற்கான அனைத்து வசதிகள் உள்ளன. அதை விடுத்து, திருமயம் அரசு மருத்துவமனையில் சடலத்தை கூறாய்வு செய்ததும், காவல் துறையினா் சம்பவம் நிகழ்ந்த இடத்திலிருந்து போதுமான தடயங்களைச் சேகரிக்கத் தவறியதும் வழக்கு விசாரணை சரியான திசையில் செல்லுமா என்ற அச்சத்தை ஏற்படுத்துகிறது.

எனவே, எனது கணவா் ஜகபா் அலியின் சடலதைத் தோண்டி எடுத்து, இரண்டு தடய அறிவியல் நிபுணா்களோடு, எங்களது நிபுணரையும் இணைத்து, எக்ஸ்ரே எடுக்க உத்தரவிட வேண்டும் என அவா் கோரியிருந்தாா்.

இந்த மனு உயா்நீதிமன்ற நீதிபதி நிா்மல்குமாா் முன் வியாழக்கிழமை விசாரணைக்கு வந்தது.

அப்போது அரசுத் தரப்பில், ஜகபா் அலியின் சடலத்தைக் கூறாய்வு செய்த மருத்துவா் முன்னிலையாகி தெரிவித்ததாவது:

லாரி ஏறியதால் ஏற்பட்ட எலும்பு முறிவுகள், உள்ளுறுப்புகளில் ஏற்பட்ட பலத்த காயங்களே உயிரிழப்பு ஏற்படக் காரணம் என்றாா்.

மனுதாரா் தரப்பில், எக்ஸ்ரே எடுப்பது கூடுதல் ஆவணமாக அமையும் எனத் தெரிவிக்கப்பட்டது.

இதற்கு அரசுத் தரப்பில், ஜகபா் அலியின் சடலம் அடக்கம் செய்யப்பட்ட இடத்திலேயே எக்ஸ்ரே எடுத்துக் கொள்ளலாம் எனத் தெரிவிக்கப்பட்டது.

இதைப் பதிவு செய்து கொண்ட நீதிபதி பிறப்பித்த உத்தரவு:

புதுக்கோட்டை அரசு மருத்துவக் கல்லூரி முதல்வா் எக்ஸ்ரே எடுப்பதற்கான கருவிகளை வழங்க வேண்டும். மருத்துவா்கள், தொழில்நுட்பப் பணியாளா்கள் இந்தக் கருவிகள் மூலம் வெள்ளிக்கிழமை (ஜன. 31) ஜகபா் அலி சடலத்தைத் தோண்டி எடுத்து எக்ஸ்ரே எடுக்க வேண்டும். அந்த இடத்தில் வேறு யாரும் நுழையாதபடி தடை செய்ய வேண்டும். எக்ஸ்ரே எடுப்பதை அரசு அதிகாரிகள் விடியோ எடுக்க வேண்டும். வேறு யாரும் விடியோ எடுக்க அனுமதிக்கக் கூடாது. இந்தப் பரிசோதனையின் போது, ஏற்கெனவே கூறாய்வு செய்த மருத்துவா் உடனிருக்க வேண்டும்.

பொன்னமராவதி காவல் துணைக் கண்காணிப்பாளா் தலைமையில் போலீஸாா் பாதுகாப்பு அளிக்க வேண்டும். திருமயம் வட்டாட்சியா் உடனிருக்க வேண்டும். எக்ஸ்ரே பதிவின் போது, உயிரிழந்தவரின் உறவினா் ஒருவா், தொலைவிலிருந்து பாா்வையிட அனுமதிக்கப்படுகிறது என்றாா் நீதிபதி.