அறிவியல் மாநாட்டில் வெற்றி பெற்ற மாணவா்களுக்கு பரிசு

தமிழ்நாடு அறிவியல் இயக்கம் சாா்பில் நடைபெற்ற குழந்தைகள் அறிவியல் மாநாட்டில் வெற்றி பெற்ற மாணவ, மாணவிகளுக்கு பரிசுகள், சான்றிதழ்கள் வழங்கும் விழா புதன்கிழமை நடைபெற்றது.

குழந்தைகளிடையே அறிவியல் ஆய்வை வளா்க்கும் விதமாக தமிழ்நாடு அறிவியல் இயக்கம், சென்னையில் உள்ள கணித நிறுவனம், அகில இந்திய மக்கள் அறிவியல் கூட்டமைப்பு ஆகியவற்றின் சாா்பில் அரசு, அரசு உதவி பெறும் பள்ளிகளில் 6-ஆம் வகுப்பு முதல் 12-ஆம் வகுப்பு வரை பயிலும் மாணவ, மாணவிகளுக்கான மதுரை மாவட்ட அளவிலான அறிவியல் மாநாடு மதுரையில் உள்ள தமிழ்நாடு அறிவியல் இயக்க அலுவலகத்தில் அண்மையில் நடைபெற்றது.

மாநாட்டில் இளநிலை தமிழ்ப் பிரிவில் 27, இளநிலை ஆங்கிலம் பிரிவில் 33, முதுநிலை தமிழ்ப் பிரிவில் 2 ஆய்வுக் கட்டுரைகள், முதுநிலை ஆங்கிலப் பிரிவில் 16 ஆய்வுக் கட்டுரைகள் என மொத்தம் 78 ஆய்வுக் கட்டுரைகள் சமா்பிக்கப்பட்டன. இவற்றில் பிப். 1-ஆம் தேதி தென்காசியில் நடைபெற உள்ள மண்டல அளவிலான மாநாட்டுக்கு திருப்பரங்குன்றம் சின்னஉடைப்பு ஊராட்சி ஒன்றிய நடுநிலைப் பள்ளி, கொட்டாம்பட்டி அருகேயுள்ள உள்ள கொடுக்கம்பட்டி அரசு உயா்நிலைப் பள்ளி, கள்ளிக்குடி ஒன்றியம், தாமஸ் ஆல்வா எடிசன் துளிா் இல்லம், திருப்பரங்குன்றம் ஒன்றியம், பெரியாா் நகா் நடுநிலைப் பள்ளி, கல்பனா சாவ்லா துளிா் இல்லம், திருப்பரங்குன்றம் அரசு உயா்நிலைப் பள்ளி, வீரபாஞ்சான் மகாத்மா குளோபல் கேட்வே மெட்ரிக் பள்ளி , அக்க்ஷரா மெட்ரிக் மேல்நிலைப் பள்ளி, மகாத்மா மாண்டிசோரி மெட்ரிக் மேல்நிலைப் பள்ளி ஆகிய பள்ளிகளைச் சோ்ந்த 9 ஆய்வுக் கட்டுரைகள் தோ்ந்தெடுக்கப்பட்டன.

மாவட்ட அளவில் நடைபெற்ற மாநாட்டில் வெற்றி பெற்ற மாணவ, மாணவிகளுக்கு பரிசுகள், சான்றிதழ்கள் வழங்கும் விழா மதுரையில் உள்ள தமிழ்நாடு அறிவியல் இயக்க அலுவலகத்தில் புதன்கிழமை நடைபெற்றது.

விழாவுக்கு தமிழ்நாடு அறிவியல் இயக்க மதுரை மாவட்டத் தலைவா் ராஜேஷ் தலைமை வகித்தாா். மாநிலச் செயலா் முத்துலட்சுமி, மாவட்டச் செயலா் மலா்ச்செல்வி ஆகியோா் முன்னிலை வகித்தனா். அகில இந்திய மக்கள் அறிவியல் கூட்டமைப்பின் துணைத் தலைவா் கிருஷ்ணசாமி, முன்னாள் மாநிலத் தலைவா் தினகரன் ஆகியோா் நீா் மேலாண்மை என்ற தலைப்பில் பேசினாா்.

இதில் ஒருங்கிணைந்த பள்ளிக் கல்வித் துறையின் மதுரை மாவட்ட வானவில் மன்ற ஒருங்கிணைப்பாளா் ஸ்டெல்லா சோபியா சிறப்பு விருந்தினராகக் கலந்து கொண்டு, வெற்றி பெற்ற மாணவ, மாணவிகளுக்கு பரிசுகள், சான்றிதழ்களை வழங்கினாா்.

நிகழ்வில் அகில இந்திய மக்கள் அறிவியல் கூட்டமைப்பின் முன்னாள் பொதுச் செயலா் ராஜமாணிக்கம், மாவட்ட இணைச் செயலா் ரமேஷ், மாவட்ட துணைத் தலைவா் வெண்ணிலா, மாவட்ட இணைச் செயலா் காமேஷ், ஆசிரியா்கள், மாணவ, மாணவிகள், பெற்றோா்கள் கலந்து கொண்டனா்.