113 ஆண்டுகளை தொட்ட டைட்டானிக்; ஆனாலும், அடங்காத ஆச்சர்யங்களைக் கூறும் ஆவணப்படம்!

இருந்த போதும் சரி... இல்லாத போதும் சரி... மக்களை தொடர்ந்து ஆச்சர்யங்களில் 'மூழ்'கடித்து வருகிறது டைடானிக் கப்பல்.

1912-ம் ஆண்டு ஏப்ரல் 10-ம் தேதி பெரும் கனவுகளோடு கிளம்பிய டைட்டானிக் கப்பல் அடுத்த ஐந்து நாள்களிலேயே பெரும் விபத்தைச் சந்தித்தது. ஏப்ரல் 15-ம் தேதி நள்ளிரவில் பனிப்பாறை ஒன்றில் மோதி 1,500 உயிர்களை காவு வாங்கியது.

இந்தக் கப்பல் மூழ்கி நேற்றோடு 113 ஆண்டுகள் ஆகிவிட்டன. ஆனாலும், இன்னமும் இந்தக் கப்பல் குறித்த ஆராய்ச்சிகள் ஓயவே இல்லை. தொடர்ந்துகொண்டே தான் உள்ளன.

வட அட்லாண்டிக் பெருங்கடலில் மூழ்கி உள்ள டைட்டானிக் கப்பல் சமீபத்தில் டிஜிட்டல் ஸ்கேன் செய்யப்பட்டு ஆவணப்படம் ஒன்று வெளியாகி உள்ளது.

எதற்காக இந்த ஆய்வு?

நேஷனல் ஜியோகிராஃபிக் மற்றும் அட்லாண்டிக் புரொடக்ஷன்ஸ் இணைந்து "டைட்டானிக்: தி டிஜிட்டல் ரெசரெக்ஷன்" என்ற ஆவணப்படத்தை தயாரித்துள்ளது.

டைட்டானிக் கப்பலின் டிஜிட்டல் ஸ்கேன் அதற்காக தான் எடுக்கப்பட்டுள்ளது.

என்ன செய்தது டிஜிட்டல் ஸ்கேன்?

அட்லாண்டிக் பெருங்கடலில் இருக்கும் பனிப்பாறைகள் சூழ்ந்திருக்கும் 3,800 மீட்டர் ஆழத்தில் டைட்டானிக் கப்பலில் சிதைந்த சின்ன சின்ன பாகங்கள் உள்ளன.

இந்தப் பாகங்கள் அனைத்தும் சுமார் 7.15 லட்சம் புகைப்படங்கள் எடுத்து ஆய்வு செய்யப்பட்டுள்ளது. இந்தப் புகைப்படங்களை எடுக்க நீரில் செயல்படும் ஸ்பெஷல் ரோபோக்கள் பயன்படுத்தப்பட்டுள்ளன.

சிதைந்த பெரிய பாகங்கள் அனைத்தும் அந்த கடலின் மிகவும் ஆழமான, இருண்ட கடல் பகுதியில் அமைதியாக உறங்கி கிடக்கின்றன.

இதனை அவ்வளவாக ஆராய முடியவில்லை.

இருந்தாலும், இதுவரை செய்யப்பட்ட ஆய்விலேயே, இந்த டிஜிட்டல் ஸ்கேன் ஆய்வு தான் டைட்டானிக் கப்பலில் முழுமையான காட்சிகளை முதன்முறையாக தந்துள்ளது.

முன்பகுதியும், பின்பகுதியும்

டைட்டானிக் கப்பலின் முன்பகுதி இப்போதும் 'பயணத்திற்கு ரெடி' என்பதுப்போல நேராக பெரும் சிதைவு எதுவும் இன்றி இருக்கிறது. ஆனால், பின்பகுதியோ முற்றிலும் சேதம் அடைந்திருக்கிறது.

ஒத்துப்போகின்றன!

டைட்டானிக் விபத்து சம்பவத்தில் தப்பி பிழைத்தவர்கள், "சிலரின் கப்பல் அறைக்குள் பனிக்கட்டிகள் நுழைந்தன" என்று கூறியிருந்தார்கள்.

இதற்கு ஒத்துப்போவதுப்போல, இந்த டிஜிட்டல் ஸ்கேன், ஜன்னல் போன்ற ஒரு அமைப்பை பனிப்பாறை உடைத்ததைக் காட்டுகிறது.

இது மட்டுமல்ல, இந்த டிஜிட்டல் ஸ்கேன் காட்டும் பல பல தகவல்கள் விபத்தில் இருந்து தப்பியவர்கள் கூறியதை ஒத்துப்போகின்றன.

இப்படி டைட்டானிக்: தி டிஜிட்டல் ரெசரெக்ஷன் ஆவணப்படத்தில் டைட்டானிக் கப்பலில் அடங்காத ஆச்சர்யங்கள் பல கூறப்பட்டுள்ளன.

இது 2022-ம் ஆண்டு, 6 வாரங்களாக ஆழ்கடல் ஆராய்ச்சியாளர்கள் எடுத்து வந்த புகைப்படங்கள் மற்றும் செய்து வந்த ஆராய்ச்சிகள் மூலம் தயாரிக்கப்பட்ட ஆவணப்படம் ஆகும்.

2022-ம் ஆண்டு திரட்டி வரப்பட்ட தகவல்களை வைத்து, பெரும் பணிகளுக்கு பிறகு, கடந்த வாரம் வெள்ளிக்கிழமை இந்த ஆவணப்படம் வெளியாகி உள்ளது.