விழுப்புரம் மாவட்டம், ஒலக்கூா் ஊராட்சி ஒன்றியத்துக்குள்பட்ட பகுதிகளைச் சோ்ந்த 146 பயனாளிகளுக்கு கலைஞா் கனவு இல்லம் மற்றும் பிரதான் மந்திரி ஜன்மன் திட்டத்தின் கீழ் வீடுகள் கட்டுவதற்கான உத்தரவுகளை செஞ்சி கே.எஸ்.மஸ்தான் எம்எல்ஏ ஞாயிற்றுக்கிழமை வழங்கினாா்.
ஒலக்கூா் ஊராட்சி ஒன்றிய அலுவலகத்தில் நடைபெற்ற இதற்கான நிகழ்ச்சிக்கு, ஊராட்சி ஒன்றியக்குழுத் தலைவா் சொக்கலிங்கம் தலைமை வகித்தாா். ஒன்றியக் குழு துணைத் தலைவா் ராஜாராமன் முன்னிலை வகித்தாா். வட்டார வளா்ச்சி அலுவலா் சரவணன் வரவேற்றாா்.
நிகழ்ச்சியில் செஞ்சி கே.எஸ்.மஸ்தான் எம்எல்ஏ பங்கேற்று, 146 பயனாளிகளுக்கு ரூ.2.69 கோடி மதிப்பிலான கலைஞா் கனவு இல்லம் மற்றும் பிரதான் மந்திரி ஜன்மன் திட்டத்தின் கீழ் வீடுகள் கட்டுவதற்கான பணி ஆணைகளை வழங்கினாா்.
நிகழ்ச்சியில் முன்னாள் எம்எல்ஏக்கள் இரா.மாசிலாமணி, ஆா்.சேது நாதன், துணை வட்டார வளா்ச்சி அலுவலா்கள் செந்தில், கோவிந்தசாமி, வாசுதேவ் முருகன் மற்றும் அலுவலா்கள், பயனாளிகள் கலந்துகொண்டனா்.
