Bigg Boss: அரசு விழாவில் சிறப்புப் பேச்சாளராகப் பேசும் `பிக் பாஸ்' முத்துக்குமரன் - பின்னணி என்ன?

பிக் பாஸ் சீசன் 8 ல் கலந்து கொண்டு டைட்டில் வென்ற ,முத்துக்குமரன் தமிழக அரசு நடத்தும் நிகழ்ச்சி ஒன்றில் சிறப்பு விருந்தினராகக் கலந்து கொண்டு உரையாற்ற இருக்கிறார்.

விஜய் டிவியில் 'தமிழ்ப் பேச்சு எங்கள் மூச்சு' நிகழ்ச்சியில் ஒரு போட்டியாளராகக் கலந்து கொண்டவர் சிவகங்கை மாவட்டம் கல்லல் பகுதியைச் சேர்ந்த முத்துக்குமரன். அந்த நிகழ்ச்சியில் இவர் டைட்டில் வெல்லவில்லை என்றபோதும், அந்த நிகழ்ச்சி மூலம்  பரவலாகக் கவனம் பெற்றார். தொடர்ந்து கடந்தாண்டு தொடங்கிய பிக் பாஸ் சீசன் 8 ல் ஒரு போட்டியாளராகக் கலந்துகொண்டார்.

ஆரம்பம் முதலே பிக் பாஸ் வீட்டில் தனது பேச்சால் சக போட்டியாளர்கள் மத்தியில் தனக்கான ஆதரவுக்களம் அமைத்தார் எனச் சொல்லலாம். வெளியிலும் நிகழ்ச்சியைப் பார்த்து வரும் ரசிகர்கள் மத்தியில் இவருக்கு ஆதரவு பெருகியது.

நிகழ்ச்சியில் பல டாஸ்க்களை வெற்றிகரமாக எதிர் கொண்டவர், 106 நாட்களும் பிக்பாஸ் வீட்டில் இருந்து கடைசியில் டைட்டிலை வென்றார்.

இந்நிலையில் தற்போது விருதுநகர் மாவட்டத்தில் தமிழ்நாடு அரசு நடத்தும் நிகழ்ச்சி ஒன்றில் சிறப்புப் பேச்சாளராக கலந்து கொண்டு உரையாற்ற இருக்கிறார். இது தொடர்பாக விருதுநகர் மாவட்ட  ஆட்சியர்  வீ.ப.ஜெயசீலன் அறிவிப்பு ஒன்றை வெளியிட்டிருக்கிறார். அதில்,

மாநில அளவிலான இரண்டாவது திருக்குறள் மாநாடு வரும் ஜனவரி 31 மற்றும் பிப்ரவரி 1 ஆகிய தேதிகளில் விருதுநகர் அரசு மருத்துவக் கல்லூரி கலையரங்கத்தில் நடைபெறவிருக்கிறது. தமிழகம் முழுவதிலிருந்தும் தமிழ்மொழி இலக்கியத் திறனறித் தேர்வில் வென்ற மாணவர்கள் கலந்து கொள்ளும் இந்த நிகழ்ச்சியில் சிறப்புப் பேச்சாளராகக் கலந்து கொண்டு 'நானும் தமிழும்' என்ற தலைப்பில் உரையாற்ற இருக்கிறார், பிக்பாஸ் 8 வது சீசன் வெற்றியாளர் முத்துக்குமரன்' என்று குறிப்பிட்டிருக்கிறார்.