Bigg Boss: கன்னட பிக்பாஸில் இருந்து விடை பெற்ற கிச்சா சுதீப் - அடுத்த தொகுப்பாளர் யார்?!

மிகவும் பிரபலமான ரியாலிட்டி ஷோக்களில் ஒன்று பிக் பாஸ்.

தமிழ், இந்தி, தெலுங்கு, மலையாளம், கன்னடம் என பல மொழிகளில் நிகழ்ச்சி நடைபெற்று வருகிறது. தமிழில் நடிகர் கமல்ஹாசன் தொடர்ந்து இந்த நிகழ்ச்சியை தொகுத்து வந்த நிலையில், அவர் பிக் பாஸ் நிகழ்ச்சியில் இருந்து விலகினார்.   இந்த வருடம் விஜய் சேதுபதி தொகுத்து வழங்கினார். அதேபோல கன்னடத்தில் கடந்த 11 வருடங்களாக இந்த பிக்பாஸ் நிகழ்ச்சியை தொடர்ந்து வெற்றிகரமாக தொகுத்து வழங்கி  வந்தார் நடிகர் கிச்சா சுதீப்.

அங்கு அவருக்கு நல்ல வரவேற்பும் கிடைத்தது. இதனிடையே சினிமாவில் தான் இன்னும் தீவிர கவனம் செலுத்தப் போவதாக இந்த 11வது சீசன் துவங்கும்போதே கூறியிருந்த கிச்சா சுதீப், இந்த சீசனுடன் தான் பிக்பாஸ் நிகழ்ச்சியில் இருந்து விடை பெறுவதாக அறிவித்து இருந்தார். அந்த வகையில் சமீபத்தில் கன்னட பிக்பாஸ் சீசன் 11 நிகழ்ச்சி வெற்றிகரமாக நிறைவடைந்தது.

இந்த நிகழ்ச்சியிலேயே தான் விடை பெறுவதாக ரசிகர்களிடம் அறிவித்தார் கிச்சா சுதீப். இதைத்தொடர்ந்து அடுத்து யார் இந்த நிகழ்ச்சியை தொகுத்து வழங்கப் போகிறார்கள் என்ற எதிர்பார்ப்பு மக்களிடையே எழுந்திருக்கிறது.

அடுத்த சீசனை ரிஷப் ஷெட்டி, ரமேஷ் அரவிந்த், சிவராஜ்குமார், ரவிச்சந்தர் மற்றும் கணேஷ் ஆகியோரில் ஒருவர் இந்த நிகழ்ச்சியைத் தொகுத்து வழங்க வாய்ப்பு இருப்பதாகத் தகவல்கள் வெளியாகி இருக்கிறது.