Serial Update: திருமண தேதியை அறிவித்த சங்கீதா - அரவிந்த் சேஜு; தொடரிலிருந்து விலகிய சீரியல் ஜோடி
Admin
- 2 days ago
சன் மியூசிக் தொகுப்பாளராகப் பரிச்சயமானவர் விஜே சங்கீதா. `அழகு' தொடர் இவருக்கென ஓர் அடையாளத்தைப் பெற்றுத்தந்தது. நடிகையாகக் களம் இறங்கியவர் தொடர்ந்து பல தொடர்களில் நடித்துக் கொண்டிருக்கிறார். கனா காணும் காலங்கள் வெப் சீரிஸில் முதல் சீசனில் மலர் டீச்சராக நடித்திருந்தார்.
இதே சீரிஸில் கலை கதாபாத்திரத்தில் நடித்தவர் அரவிந்த் சேஜூ. சங்கீதாவும் அரவிந்த் சேஜூவும் காதலிப்பதைச் சங்கீதா அவருடைய இன்ஸ்டாகிராம் பக்கத்தில் அறிவித்திருந்தார். இருவரும் விரைவில் திருமணம் செய்து கொள்ள இருப்பதாகத் தகவல்கள் வெளியாகி வந்த நிலையில் தற்போது அவரே அதிகாரப்பூர்வமாக அவருடைய திருமணம் குறித்து அறிவித்திருக்கிறார்.
வருகிற பிப்ரவரி மாதம் 2 ஆம் தேதி இவர்களுடைய திருமணம் நடைபெறவிருக்கிறது. அரவிந்த் சேஜூவின் பெற்றோர்கள் கொரோனா சமயத்தில் உயிரிழந்துவிட்டதால் அவருடைய அண்ணன்தான் அவருக்கு எல்லாமும்! விரைவிலேயே இருவீட்டு பெரியவர்கள் முன்னிலையில் இவர்களுடைய திருமணம் நடைபெறவிருக்கிறது.
அரவிந்த் விஜய் டிவியில் இன்று முதல் ஒளிபரப்பாகவிருக்கும் `அய்யனார் துணை' தொடரில் கதாநாயகனாக நடிக்கிறார். `எதிர்நீச்சல்' தொடரில் நடித்திருந்த மதுமிதா அவருக்கு ஜோடியாக நடிக்கிறார்.
வாழ்த்துகள் அரவிந்த் - சங்கீதா!
ஜீ தமிழில் ஒளிபரப்பாகிக் கொண்டிருக்கும் தொடர் `மாரி'. இந்தத் தொடரில் நடித்துக் கொண்டிருந்தவர் ஆஷிகா படுகோனே. இந்தத் தொடரிலிருந்து இவர் விலகப் போவதாகத் தகவல்கள் வெளியாகின. ஆனால் அவர் தொடர்ந்து நடித்துக் கொண்டிருந்தார்.
தற்போது ஆஷிகா உண்மையிலேயே தொடரிலிருந்து விலகி இருக்கிறார். அவர் மட்டுமல்லாமல் அந்தத் தொடரின் நாயகன் ஆதர்ஷூம் தொடரிலிருந்து விலகி இருக்கிறார்.
800 எபிசோட் கடந்ததை சீரியல் குழுவினர் சமீபத்தில் கொண்டாடி மகிழ்ந்த நிலையில் தற்போது கதாநாயகன், கதாநாயகி இருவரும் தொடரிலிருந்து விலகி இருப்பது பலரையும் அதிர்ச்சிக்குள்ளாக்கியிருக்கிறது.
வேறொரு கதைக்களத்தில் புதியதாக மாரி தொடர் வரவிருப்பதாகத் தகவல்கள் வெளியாகி இருக்கின்றன.
விஜய் டிவியில் ஒளிபரப்பாகிக் கொண்டிருக்கும் தொடர் `வீட்டுக்கு வீடு வாசப்படி'. இந்தத் தொடரில் திரவியம் கதாநாயகனாக நடித்துக் கொண்டிருந்தார். தற்போது அவர் விஜய் டிவியில் ஒளிபரப்பாகும் `சிந்து பைரவி' தொடரில் நடிக்கிறார்.
நடிகர்கள் பட்டாளத்துடன் இறங்கிய `வீட்டுக்கு வீடு வாசப்படி' தொடர் தற்போது நிறைவடைந்திருக்கிறது. இந்தத் தொடரில் நடித்திருந்த ஆர்த்தி சுபாஷூம் சிந்து பைரவி தொடரில் நடிக்கிறார்.
சினிமா விகடனின் பிரத்யேக Whatsapp க்ரூப்
https://chat.whatsapp.com/KzgH8aPb2MI9PVttY53JpX
சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...
உங்கள் வாட்ஸ் அப் மூலமே இணைந்திருங்கள் சினிமா விகடனுடன்...
