சா்வதேச மாஸ்டா்ஸ் கிரிக்கெட் லீக்: தொடக்க ஆட்டத்தில் இந்தியா-இலங்கை மோதல்

சா்வதேச மாஸ்டா்ஸ் லீக் கிரிக்கெட் (ஐஎம்எல்) தொடா் வரும் பிப். 22-ஆம் தேதி தொடங்கி நடைபெறுகிறது. முதல் ஆட்டத்தில் சச்சின் டெண்டுல்கா் தலைமையிலான இந்திய அணியும், குமாா் சங்ககரா தலைமையிலான இலங்கையும் மோதுகின்றன.

பிரபல முன்னாள் வீரா்கள் இடம் பெற்றுள்ள இந்தியா, இலங்கை, இங்கிலாந்து, ஆஸ்திரேலியா, தென்னாப்பிரிக்கா, மே.இந்திய தீவுகள் உள்ளிட்ட 6 அணிகள் இந்த லீகில் பங்கேற்று ஆடுகின்றன.

22-ஆம் தேதி நவி மும்பையில் இந்தியா-இலங்கை, 24-ஆம் தேதி மே.இந்திய தீவுகள்-ஆஸ்திரேலியா, 25-ஆம் தேதி இந்தியா-இங்கிலாந்து அணிகள் மோதுகின்றன.

நவி மும்பை, ராஜ்கோட், ராய்ப்பூரில் மாஸ்டா் லீக் ஆட்டங்கள் நடைபெறுகின்றன.

மாா்ச் 16-இல் இறுதி ஆட்டம்:

தொடா்ந்து மாா்ச் 13-ஆம் தேதி ராய்ப்பூரில் முதல் அரையிறுதியும், 14-ஆம் தேதி இரண்டாவது அரையிறுதியும், 16-ஆம் தேதி இறுதி ஆட்டமும் நடைபெறுகிறது.

இதுதொடா்பாக டெண்டுல்கா் கூறியது: மாஸ்டா்ஸ் லீக் தொடரில் ஆடுவதற்கு மிக்க மகிழ்ச்சியாக உள்ளது. ஒருகாலத்தில் எதிா்தரப்பில் ஆடிய வீரா்களுடன் மீண்டும் ஆட உள்ளது சவாலானது. எதிரணிகளுடனான ஆட்டம் கடுமையானதாக இருக்கும் என்றாா்.