Dubai: தங்க இழை தூவிய Gold Karak Tea; டீ குடித்துவிட்டு வெள்ளி டம்ளரை எடுத்து செல்லலாம் - விலை என்ன?

வெள்ளி போப்பையில் தங்க இழை, தங்க துகள்கள் தூவப்பட்டு தரப்படும் தேநீர் குறித்த Food Vloger-ன் இன்ஸ்டாகிராம் பதிவு தற்போது நெட்டிசன்களின் கவனத்தை ஈர்த்துள்ளது.

வாடிக்கையாளர்கள் நினைவு பரிசாக அந்த வெள்ளிக் கோப்பையையும் எடுத்துச் செல்லலாம் என்று கூறப்படுகிறது. ஆகா தாராளமான கடையாக இருக்கிறதே என்று நினைத்தால்... இந்த ஒரு கப் தேநீரின் விலை ஒரு லட்சத்திற்கும் அதிகம். இது தேநீர் பிரியர்களிடையே சற்று அதிர்ச்சியை ஏற்படுத்தியுள்ளது.

இந்தியர்களின் அன்றாட வாழ்வில் தேநீர்(tea) மிக முக்கிய பங்கு வகிக்கின்றது. காலையில் ஒரு கப் தேநீருடன் தொடங்கும் நாள் மீண்டும் ஒரு கப் தேநீருடன் தான் முடிவடைகின்றது. இதற்கிடையில் ஜாலிக்காக ஒரு கப், சோகத்திற்காக ஒரு கப், களைப்பின் போது ஒரு கப், இப்படி வாங்க ஒரு டீ போட்டுவிட்டு வரலாம் என்று கூறுவோர் ஏராளம்.

இவ்வாறு நம் அன்றாட வாழ்வில் அசால்டாக குடிக்கும் தேநீரின் விலை ஒரு லட்சம் என்றால் அது சற்று ஆச்சரியம் தான்.

இந்த தேநீரை விற்பது துபாயில் உள்ள ஃபோஹோ கஃபே. 24 கேரட் தங்க இழைகளுடன் வழங்கப்படும் 'கோல்ட் காரக்' தேநீரை ஒரு லட்சத்திற்கு மேல் கொடுத்தால் தான் உங்களால் வாங்க முடியும். என்னதான் பிசினஸ் ஐடியாவாக இருந்தாலும் ஒரு லட்சம் கொடுத்து டீ குடிப்பதா... என்கின்றனர் நெட்டிசன்கள்.

இந்த யூடியூபர் தன்னுடைய இன்ஸ்டாகிராம் பதிவில், ''உலகின் மிக ஆடம்பரமான காரக் தேநீரின் சுவையை அனுபவிக்கவும். வெள்ளி கோப்பையில் 24 கேரட் தங்கத் துகள்கள் தூவப்பட்டு ஒவ்வொரு துளியிலும் அதன் பிரமாண்டத்தை அனுபவிக்கலாம், அத்துடன் உங்களுக்கென வெள்ளி கோப்பையை எடுத்துச்செல்லலாம்." என்று பதிவிட்டுள்ளார்..

டீ பிரியர்கள் அதிக விலை கொண்ட இந்த தேநீருக்கு வரவேற்பளிக்கவில்லை என்பதை கமென்ட் செக்‌ஷனைப் பார்த்து தெரிந்துகொள்ளலாம்.வெள்ளி கோப்பை மற்றும் தங்க துகள்களுக்கு இவ்வளவு விலை வசூலிப்பது அதிகம் என்றும் தேநீரின் சுவையை அனுபவித்துக் கொண்டிருக்கும் போது தங்க துகள்களின் குறுக்கீடு தேவையில்லை என்றும் விமர்சித்துக் கொண்டிருக்கின்றனர்.