Erode East: ஈரோடு கிழக்குத் தொகுதி இடைத்தேர்தல் அறிவிப்பு - முழு விவரம் இங்கே

தமிழகத்தில் காலியாக இருக்கும் ஈரோ கிழக்கு தொகுதிக்கான இடைத்தேர்தல் தேதியை இந்தியத் தேர்தல் ஆணையம் அறிவித்திருக்கிறது.

7 வது டெல்லி சட்டசபையின் பதவிக்காலம் விரைவில் முடிவடைய இருக்கும் நிலையில், டெல்லி சட்டமன்றத் தேர்தலுக்கான தேதியை அறிவிப்பதற்கான பத்திரிகையாளர் சந்திப்பை தேர்தல் ஆணையம் ஏற்பாடு செய்திருந்தது. டெல்லியிலுள்ள தேர்தல் ஆணையத்தில் பத்திரிகையாளர்களை சந்தித்த தலைமை தேர்தல் ஆணையர் ராஜிவ் குமார் மற்றும் தேர்தல் ஆணையர்கள் யானேஷ் குமார், சுக்பீர் சிங் சந்து ஆகியோர் டெல்லி சட்டமன்றத் தேர்தல் வாக்குப்பதிவு பிப்ரவரி 5-ம் தேதி, வாக்கு எண்ணிக்கை பிப்ரவரி 8 -ம் தேதி நடக்குமென அறிவித்தனர். தொடர்ந்து பேசியவர்கள் ஈரோடு கிழக்குத் தொகுதிக்கான இடைத்தேர்தலும் பிப்ரவரி 5 ஆம் தேதி நடக்குமென அறிவித்திருக்கின்றனர். மேலும், வேட்புமனு தாக்கல் ஜனவரி 10 ஆம் தேதி தொடங்கி 17 ஆம் தேதி வரை நடக்கும் என்றும் அறிவித்திருக்கின்றனர்.

ஈரோடு கிழக்குத் தொகுதியில் காங்கிரஸ் சார்பில் அந்தக் கட்சியின் மூத்தத் தலைவர் ஈவிகேஎஸ் இளங்கோவனின் மகன் திருமகன் ஈவெரா வென்றிருந்தார். திடீரென அவர் உயிரிழந்த நிலையில் நடந்த இடைத்தேர்தலில் ஈவிகேஎஸ் இளங்கோவன் போட்டியிட்டு வென்றார். அவரும் கடந்த டிசம்பர் 14 ஆம் தேதி உயிரிழந்த நிலையில், இடைத்தேர்தல் எப்போது அறிவிக்கப்படும் என்கிற எதிர்பார்ப்பு உருவாகியிருந்தது. இதனைத் தொடர்ந்துதான் தேர்தல் ஆணையம் இப்போது ஈரோடு கிழக்குத் தொகுதிக்கான இடைத்தேர்தல் தேதியை அறிவித்திருக்கிறது. இதன்மூலம், ஈரோடு கிழக்குத் தொகுதியில் தேர்தல் நடத்தை விதிமுறைகளும் அமலுக்கு வந்திருக்கிறது.

திமுக கூட்டணியில் ஈரோடு கிழக்குத் தொகுதி எந்தக் கட்சிக்கு செல்லும்? அதிமுக இந்த இடைத்தேர்தலையும் புறக்கணிக்குமா? பாஜக என்ன செய்யப்போகிறது? 2026 தான் இலக்கு என கூறும் விஜய் என்ன செய்யப்போகிறார்? என பலத்த எதிர்பார்ப்புகள் உருவாகியிருக்கிறது.