Fengal: ஊட்டி வரை எதிரொலித்த ஃபெஞ்சலின் தாக்கம் - மலை ரயில் ரத்து; கடும் பனி மூட்டம்; தொடரும் மழை
Admin
- 4 hours ago
புதுச்சேரி மற்றும் தமிழகத்தின் கடலோர மாவட்டங்களில் கடுமையான சேதத்தை ஏற்படுத்திய ஃபெஞ்சல் புயலின் தாக்கம் நீலகிரி மாவட்டம் எதிரொலித்து வருகிறது. நேற்று முன்தினம் முதலே நீலகிரி மாவட்டத்தின் பல பகுதிகளிலும் கடுமையான பனி மூட்டம் சூழ தொடங்கியது. சில பகுதிகளில் மழை பெய்து வந்தது.
4 நாள் பயணமாக தமிழ்நாட்டிற்கு வருகைத் தந்திருந்த குடியரசு தலைவர் திரௌபதி முர்மு ஃபெஞ்சல் புயலின் தாக்கம் காரணமாக திருவாரூர் பயணத்தை ரத்து செய்து விட்டு நேற்று முன்தினமே டெல்லி திரும்பினார். ஊட்டியில் நிலவிய கடுமையான பனி மூட்டம் காரணமாக ஹெலிகாப்டர் மூலம் பயணிக்க முடியாமல் சாலை மார்க்கமாகவே கோவை விமான நிலையத்தை அடைந்தார்.
ஊட்டி மற்றும் சுற்றுவட்டார பகுதிகளில் நேற்று முழுவதும் பனி மூட்டம் தொடர்ந்த நிலையில், நள்ளிரவு முதல் கனமழை தொடங்கி விடிய விடிய கனமழை பெய்தது. மழையின் தீவிரம் காரணமாக நீலகிரி மாவட்டத்தில் ஊட்டி, கோத்தகிரி, கூடலூர் ஆகிய தாலுகாகளுக்கு உட்பட்ட பள்ளி கல்லூரிகளுக்கு இன்று விடுமுறை அறிவிக்கப்பட்டுள்ளது. மண்சரிவு அபாயம் காரணமாக சுற்றுலா பயணிகளின் பாதுகாப்பை கருத்தில் கொண்டு நீலகிரி மலை ரயில் சேவை இன்றும் நாளையும் ரத்து செய்யப்பட்டுள்ளது.
மாவட்டத்தில் பரவலாக தொடர் மழையுடன் கடுமையான பனி மூட்டமும் நிலவுவதால் மலைப்பாதைகளில் கூடுதல் கவனத்துடன் வாகனங்களை இயக்க மாவட்ட நிர்வாகம் அறிவுறுத்தி வருகிறது. மழை தொடர்ந்தால் மண் சரிவு மற்றும் மரங்கள் பெயர்ந்து விழும் அபாயம் இருப்பதால் ஆபத்தான இடங்களில் நடமாடுவதை உள்ளுர் மக்களும் சுற்றுலா பயணிகளும் தவிர்க்க வேண்டும் எனவும் மாவட்ட நிர்வாகம் சார்பில் வலியுறுத்திப்பட்டுள்ளது.
இதனிடையே ஊட்டியில் கன மழை காரணமாக வீடு இடிந்து விழுந்ததில் ஒருவர் உயிரிழந்தார். ஊட்டியில் கன மழை காரணமாக நேற்றிரவு முதல் பெய்து வரும் கன மழை காரணமாக, நொண்டிமேடு பகுதியில் வீடு இடிந்து விழுந்ததில் வீட்டில் இருந்து ஆறுமுகம் (43) என்பவர் உயிரிழந்தார்.
நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...
