Irfan: தொப்புள் கொடி வீடியோ; மீண்டும் சர்ச்சையில் சிக்கிய இர்ஃபான் - நடந்தது என்ன?

தமிழில் பிரபல யூடியூபராக வலம் வருபவர் இர்ஃபான்.

இவர், யூடியூபில் தனக்கென ஒரு சேனலை வைத்து அதன் மூலம் பல கடைகளுக்குச் சென்று, அங்கிருக்கும் விதவிதமான உணவுகளை சாப்பிட்டு ரிவ்யூ செய்து வருகிறார். இவருக்கு பெரிய ரசிகர்கள் கூட்டமும் இருக்கிறது. இதையடுத்து, சில மாதங்களுக்கு முன்பு, தனக்கு என்ன குழந்தை பிறக்க இருக்கிறது என்பதை தெரிந்து கொண்ட அவர், 'Gender Reveal' என்ற பெயரில் அந்த வீடியோவையும் வெளியிட்டிருந்தார். இது பெரும் சர்ச்சையை கிளப்பி இருந்தது.

பலரும் இர்ஃபானுக்கு எதிராகக் கருத்துகளை முன்வைத்திருந்தனர். இதையடுத்து, இப்போது மீண்டும் ஒரு சர்ச்சையில் சிக்கியிருக்கிறார். இர்ஃபானுக்கு கடந்த ஜூலையில் குழந்தை பிறந்தது. இதையடுத்து, மனைவியின் பிரசவத்தின்போது குழந்தையின் தொப்புள் கொடியை இர்ஃபானே கத்தரிக்கோலால் வெட்டுவதை வீடியோவாக எடுத்து யூடியூபில் வெளியிட்டிருக்கிறார். இந்நிலையில் அறுவை சிகிச்சை அறைக்குள் வீடியோ எடுத்து அதனை யூடியூபில் பதிவிட்டதற்கும், தொப்புள் கொடியை இர்ஃபான் வெட்டியதற்கும் மருத்துவர்கள் கண்டனம் தெரிவித்திருகின்றனர்.

மேலும் மருத்துவர்கள் தவிர மற்றவர்கள் தொப்புள் கொடியை வெட்டுவது போன்ற செயல்களில் ஈடுபடுவது சட்டப்படி தவறு என்பதால் அவர் வெளியிட்டிருக்கும் அந்த வீடியோவை நீக்கக் கோரி மருத்துவத்துறை கடிதம் அனுப்பி இருக்கிறது.