Jaiswal: ஆஸ்திரேலியாவில் கடுப்பான ரோஹித்... ஜெய்ஸ்வால் இன்றி புறப்பட்ட டீம் பஸ்?

இந்திய கிரிக்கெட் அணியின் கேப்டன் ரோஹித் சர்மா சக வீரர் யஷஸ்வி ஜெய்ஸ்வால் மீது கோபம் அடைந்ததாக செய்திகள் வெளியாகி இருக்கிறது.

இந்திய அணி ஆஸ்திரேலியாவுக்கு சுற்றுப்பயணம் மேற்கொண்டு 5 போட்டிகள் கொண்ட பார்டர் கவாஸ்கர் தொடரில் விளையாடி வருகிறது. பும்ரா தலைமையிலான முதல் போட்டியில் வெற்றி பெற்ற இந்திய அணி ரோஹித் தலைமையிலான இரண்டாவது போட்டியில் தோல்வியைத் தழுவி இருக்கிறது. பலரும் ரோஹித் சர்மாவின் கேப்டன்ஷியை விமர்சித்தனர். தற்போது பிரிஸ்பேனில் நடைபெறவுள்ள மூன்றாவது போட்டிக்கு இந்திய அணி தயாராகி வருகிறது.

இதனைத்தொடர்ந்து அடிலெய்டில் இருந்து பிரிஸ்பேன் செல்வதற்காக கிளம்பிய இந்திய அணியின் டீம் பஸ்ஸில் இளம் வீரரும் இந்திய அணியின் தொடக்க பேட்ஸ்மேனுமான யஷஸ்வி ஜெய்ஸ்வால் பயணிக்கவில்லை. இதற்கான காரணம் என்ன என்பது குறித்த சில தகவல்கள் வெளியாகியுள்ளது. அடிலெய்டில் இருந்து பிரிஸ்பேன் செல்வதற்காக இந்திய வீரர்கள் தயாராக இருந்துள்ளனர். அவர்களுடன் பயிற்சியாளர்கள், அணியின் உதவியாளர்களும் தயாராக இருந்துள்ளனர். இரண்டு பேருந்துகள் அவர்களை அழைத்துச் செல்ல வந்துள்ளது.

ரோஹித் சர்மா, கவுதம் கம்பீர், விராட் கோலி உள்ளிட்ட அனைத்து வீரர்களும் பேருந்தில் ஏறிய பின்னும், இளம் வீரர் ஜெய்ஸ்வால் வராமல் இருந்திருக்கிறார். அவருக்காக அனைத்து வீரர்களும் காத்திருக்கின்றனர். நீண்ட நேரம் காத்திருந்தும் ஜெஸ்வால் வராமல் இருந்ததால் ரோஹித் சர்மா மிகுந்த கோபம் அடைந்ததாகச் சொல்லப்படுகிறது. பிறகு ஜெய்ஸ்வால் இல்லாமல் பேருந்து புறப்பட்டுள்ளது.

இதன்பின், 20 நிமிடங்களுக்கு மேலான பிறகு ஹோட்டலின் லாபிக்கு வந்த ஜெய்ஸ்வால் அணியினர் புறப்பட்டு சென்றதைப் பார்த்திருக்கிறார். அதன் பிறகு ஜெய்ஸ்வாலுக்காக பாதுகாவலர்கள் அடங்கிய காரை இந்திய அணி ஏற்பாடு செய்திருக்கிறது. அதில் ஏறி, விமான நிலையம் சென்று அணியினர் உடன் அவர் இணைந்திருக்கிறார் என்று அங்கிருந்து வரும் தகவல்கள் தெரிவிக்கின்றன.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/MadrasNallaMadras