Mumbai: காங்கிரஸ் அலுவலகத்தை சூறையாடிய பாஜக தொண்டர்கள்; தடியடி நடத்தி விரட்டியடிப்பு -என்ன நடந்தது?

மத்திய அமைச்சர் அமித் ஷா பாபாசாஹேப் அம்பேத்கருக்கு எதிராக பேசியதாக காங்கிரஸ் குற்றம் சாட்டியுள்ளது. இதனால் பாராளுமன்றத்தில் தள்ளுமுள்ளு ஏற்பட்டது. இதற்காக ராகுல் காந்தி மீது டெல்லி போலீஸார் வழக்குப்பதிவு செய்துள்ளனர். இச்சம்பவத்தால் மும்பையில் உள்ள காங்கிரஸ் அலுவலகத்திற்கு வெளியில் பா.ஜ.க இளைஞரணி தொண்டர்கள் போராட்டம் நடத்தினர். அவர்கள் இளைஞரணித்தலைவர் தேஜிந்தர் சிங் தலைமையில் இப்போராட்டத்தை நடத்தினர். அங்கு காங்கிரஸ் தொண்டர்களும் கூடினர்.

தென்மும்பையில் உள்ள மும்பை காங்கிரஸ் அலுவலகத்திற்கு வெளியில் இரு கட்சிகளின் தொண்டர்களும் கூடியதால் பரபரப்பு ஏற்பட்டது. பா.ஜ.க-வினர் ராகுல் காந்திக்கு எதிராக கோஷமிட்டனர். அதோடு கட்சி அலுவலகத்திற்கு வெளியில் வைக்கப்பட்டு இருந்த பேனரை கிழித்ததோடு, அதில் இருந்த காங்கிரஸ் தலைவர்கள் படங்கள் மீது இங்க் தெளித்தனர்.

அவர்களின் போராட்டம் ஒரு கட்டத்தில் மோசமடைந்தது. பா.ஜ.க தொண்டர்கள் காங்கிரஸ் அலுவலகத்திற்குள் நுழைந்து அங்கிருந்த பொருள்களை அடித்து உடைத்து அலுவலகத்தை சூறையாடினர். கண்ணாடி கதவை உடைத்தனர். போலீஸார் போராட்டக்காரர்களை கட்டுப்படுத்த முயன்றனர். ஆனால் அவர்களால் கட்டுப்படுத்த முடியவில்லை. இதனால் போராட்டக்காரர்கள் மீது போலீஸார் தடியடி நடத்தினர். மேலும் சிலரை போலீஸ் நிலையத்திற்கு அழைத்துச் சென்றனர். காங்கிரஸ் அலுவலகத்தை அடித்து நொறுக்கியது தொடர்பாக பா.ஜ.க நிர்வாகிகள் மீது போலீஸார் வழக்குப்பதிவு செய்துள்ளனர். இச்சம்வத்தால் அங்கு பெரும்பரபரப்பு ஏற்பட்டது.

இது தொடர்பாக மும்பை காங்கிரஸ் தலைவர் வர்ஷா கெய்க்வாட் வெளியிட்டுள்ள ட்விட்டர் செய்தியில், "இது ஜனநாயக போராட்டம் கிடையாது, போலீஸ் பாதுகாப்புடன் நடத்தப்பட்ட தாக்குதல், உள்துறை அமைச்சர் என்ன செய்து கொண்டிருக்கிறார்?" என்று கேள்வி எழுப்பியுள்ளார்.

போலீஸார் பிரகாஷ் அம்பேத்கரின் பேரணிக்கு பாதுகாப்புக்குச் சென்ற நேரத்தில் இத்தாக்குதல் நடந்துள்ளது. மாநில காங்கிரஸ் தலைவர் நானாபட்டோலேவும் இத்தாக்குதலை வன்மையாக கண்டித்துள்ளார். இச்சம்வத்தை தொடர்ந்து காங்கிரஸ் அலுவலகத்திற்கு பாதுகாப்பு அதிகரிக்கப்பட்டுள்ளது.