Doctor Vikatan: என் மகனுக்கு வயது 25. அவனுக்கு கடந்த சில தினங்களாக காது அடைத்துக்கொண்டதாகச் சொல்கிறான். காதிலிருந்து சத்தம் வருவதாகவும் சொல்கிறான். மருந்துக் கடையில் காதுகளைச் சுத்தப்படுத்தும் டிராப்ஸ் வாங்கிப் போட்டும் பிரச்னை சரியாகவில்லை. இ.என்.டி மருத்துவரிடம் காட்டி, காதுகளை சுத்தப் படுத்தலாமா? தொடர்ச்சியாக இயர்போன் (ear phone) பயன்படுத்துவதுதான் இந்தப் பிரச்னைக்கு காரணமாக இருக்குமா?
பதில் சொல்கிறார் சென்னையைச் சேர்ந்த இ.என்.டி மருத்துவர் பி.நட்ராஜ்
காதில் அடைப்பு ஏற்படுவதற்கு பல காரணங்கள் உள்ளன. இவற்றுள் இரண்டு காரணங்கள் பொதுவானவை. ஒன்று காதில் குருமி அடைத்துக் கொள்வது... இரண்டாவது சளி அல்லது தொண்டை வலி.
காதில் குறும்பி உருவாவது இயற்கையே, சிறிதளவு தினமும் உற்பத்தியாகும் இந்தக் குறும்பி, தானாகவே வெளியே வருவதற்கு இயற்கையான அமைப்பு இருக்கிறது. நாம் விரல் அல்லது வேறு ஏதாவது பொருள் கொண்டு குடைவதாலோ அல்லது நெடுநேரம் இயர்போன் (ear phone) போன்ற கருவிகள் பயன்படுத்துவதாலோ இந்தக் குறுமி வெளியேறாமல் உள்ளேயே தங்கிவிடும். நாள்பட நாள்பட காதில் அடைப்பு ஏற்பட வாய்ப்பு உள்ளது. அப்போது ENT மருத்துவரை அணுகி அவரிடம் அதைச் சுத்தம் செய்து கொள்ள வேண்டி வரும்.
தொற்று அல்லது ஒவ்வாமையினால் சளி பிடித்தாலோ அல்லது தொண்டை வலி ஏற்பட்டாலோ அதன் விளைவாகவும் காதில் அடைப்பு ஏற்பட வாய்ப்பு உள்ளது. இவ்வாறு நேர்ந்தால் அந்தச் சளி தானாகவோ அல்லது சிகிச்சை மூலமாகவோ சரியான பின் காதில் அடைப்பு தானாகவே நீங்கிவிடும். இவை இரண்டும் பொதுவாக அடைப்பு ஏற்படுவதற்கான காரணங்கள். இவை அல்லாமல் அரிதாக வரும் காரணங்கள் பல உள்ளன.
ENT மருத்துவரை சந்தித்தால் அடைப்பு எதனால் ஏற்படுகிறது என்பதைக் கண்டறிந்து அதற்கான உரிய சிகிச்சையைப் பரிந்துரை செய்வார். காதில் அடைப்பு ஏற்படுத்தும் எந்தக் காரணத்தினாலும் காதில் சத்தமும் ஏற்படலாம். அந்த வகையில் இயர்போன் (ear phone) பயன்பாடும் இதற்கொரு காரணமாகலாம். எனவே, உங்கள் மகனை ENT மருத்துவரிடம் காண்பித்து எதனால் இந்த அடைப்பு ஏற்படுகிறது என்பதை அறிந்துகொண்டு அதற்கான உரிய சிகிச்சை எடுத்துக் கொண்டால் நிவாரணம் கிடைக்கும்.
உங்கள் கேள்விகளை கமென்ட் பகுதியில் பகிர்ந்து கொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
.jpg)
