Seeman : 'உருட்டுக்கட்டையுடன் தொண்டர்கள்; பிரியாணி போடும் சீமான்' - இராவணக்குடில் களேபரங்கள்!

நீலாங்கரையில் உள்ள நாம் தமிழர் கட்சியின் ஒருங்கிணைப்பாளர் சீமானின் வீட்டை பெரியாரிய ஆதரவாளர்கள் கூட்டமைப்பு சார்பில் முற்றுகையிட முயன்று கைதாகியிருக்கின்றனர். இந்த முற்றுகையை முன்னிட்டு சீமானின் வீட்டை சுற்றி நாம் தமிழர் தொண்டர்கள் உருட்டுக்கட்டையோடு நிற்கும் சம்பவமும் பரபரப்பை கிளப்பியிருக்கிறது.

கடந்த ஜனவரி 8 ஆம் தேதி கடலூரில் நடந்த ஒரு கட்சி கூட்டத்தின் முடிவில் பத்திரிகையாளர்களை சந்தித்த சீமான், பெரியாரின் பெண்ணியம் சார்ந்த கருத்துகள் குறித்து காட்டமாக பேசியிருந்தார். இந்தப் பேச்சு பெரியாரிய ஆதரவாளர்கள் மத்தியில் கொந்தளிப்பை ஏற்படுத்தியிருந்தது. சீமானும் தொடர்ச்சியாக ஒவ்வொரு பத்திரிகையாளர்கள் சந்திப்பிலும் பெரியார் பற்றி கடுமையான விமர்சனங்களை முன்வைத்து வந்தார். இதனைத் தொடர்ந்துதான் மே 17 இயக்கம் சார்பில் பெரியாரிய அமைப்புகள் ஒன்றிணைந்து சீமானின் வீடு இன்று முற்றுகையிடப்படும் என அறிவிக்கப்பட்டது.

இதனைத் தொடர்ந்து சீமானின் வீட்டு முன்பாக சுமார் 100 தொண்டர்கள் நேற்று இரவு முதல் அவருக்கு பாதுகாப்பாக நின்று வருகின்றனர். அவர்கள் உருட்டுக்கட்டை போன்ற ஆயுதங்களையும் வைத்திருந்ததால் பரபரப்பான சூழல் ஏற்பட்டது. சீமானின் வீட்டிலேயே அவர்களுக்கு காலை, மதியம் என இட்லி, பொங்கல், வடை, சுடச்சுட பிரியாணி என சமைத்துக் கொடுக்கப்பட்டிருக்கிறது. இது தொடர்பாக பேசும் நாம் தமிழர் கட்சியினர், இந்த உருட்டுக்கட்டைகள் எங்களின் தற்காப்புக்காக வைத்திருக்கிறோம்’ என்கிறார்கள். மேலும், ''21 ஆம் தேதி அண்ணன் ஈரோட்டுக்கு போகிறார் என கட்சியின் கொள்கை பரப்புச் செயலாளர் துரைமுருகன் பேசிய நிலையில், முற்றுகை போராட்ட அறிவிப்பை தொடர்ந்துதான் சீமான் வீட்டிலேயே இருக்கிறார் போல.." என்றனர்.

இந்நிலையில், சீமானின் வீட்டை நோக்கி முற்றுகை பேரணியை தொடங்கிய பெரியாரிய ஆதரவாளர்கள், அமைப்பினரை காவல்துறையினர் கைது செய்திருக்கின்றனர்.