Trump Tower: எண்ணிலடங்கா ஆடம்பரங்கள்; சர்ச்சை - இந்தியாவில் விரிவடையும் ட்ரம்ப் நிறுவன கரங்கள்!

மும்பையில் நாளுக்கு விண்ணை முட்டும் அடுக்கு மாடிக்கட்டடங்களின் எண்ணிக்கை அதிகரித்துக்கொண்டே செல்கிறது. அமெரிக்க அதிபர் தேர்தலில் முன்னிலையில் இருக்கும் டொனால்டு ட்ரம்ப் மகன் டொனால்டு ட்ரம்ப் ஜூனியர் ரியல் எஸ்டேட் தொழிலில் கொடிகட்டிப்பறக்கிறவர். அவர் உலகம் முழுவதும் பிரபல கட்டுமான நிறுவனங்களுடன் இணைந்து கட்டுமானப்பணிகளை மேற்கொண்டு வருகிறார்.

அவர் பொதுவாக அமெரிக்காவுக்கு வெளியில் நேரடியாக எந்தவித கட்டுமானத்திலும் ஈடுபடுவது கிடையாது. ஆனால் தனது கம்பெனி பெயர் மற்றும் ட்ரம்ப் பெயரை பயன்படுத்திக்கொள்ள வேறு கம்பெனிகளுக்கு அனுமதி கொடுத்து அதன் மூலம் கட்டப்படும் வீட்டை விற்பனை செய்வதில் கிடைக்கும் தொகையில் 3 முதல் 4 சதவீதத்தை பெற்றுக்கொள்வது வழக்கம். அப்படியான அவரின் திட்டத்தில், அவர் இந்தியாவையும் விட்டு வைக்கவில்லை. முதன் முதலில் ஜூனியர் ட்ரம்ப் மும்பையில் தான் தான் தனது கட்டுமானப்பணியை தொடங்கினார்.

மும்பை மட்டுமல்லாது புனேயிலும் ட்ரம்ப் டவர் கட்டப்பட்டது. இதற்காக மும்பையில் பிரபலமான விளங்கும் லோதா நிறுவனத்துடன் இணைந்து டொனால்டு ட்ரம்ப் ஜூனியர் 2014-ம் ஆண்டு மும்பையில் அடுக்குமாடி குடியிருப்பு கட்டடம் கட்டும் திட்டத்தை தொடங்கினார். ட்ரம்ப் டவர் என்ற பெயரில் 79 மாடியில் அக்கட்டடம் கட்டப்பட்டது. இக்கட்டிடம் 2018-ம் ஆண்டு கட்டி முடிக்கப்பட்டது. இதில் பாலிவுட் பிரபலங்கள் மற்றும் தொழிலதிபர்கள் வீடுகளை வாங்கி இருக்கின்றனர். 3, 4, 5 படுக்கை வசதி கொண்ட வீடுகள் இதில் இருக்கிறது. இங்குள்ள வீட்டின் அதிக பட்ச விலை இப்போது ரூ.25 கோடியாகும். இதில் வீடுகளை வாங்கி பாலிவுட் பிரபலங்கள் வாடகைக்கு கொடுத்திருக்கின்றனர். இக்கட்டடத்தில் வீடு வாங்குபவர்களுக்கு 10 மணி நேரம் விமானத்தில் பறக்க சலுகை வழங்கப்படும் என்று அறிவித்து வீடுகளை விற்றனர் என்பது குறிப்பிடத்தக்கது.

ஆனால் சொன்னபடி விமானத்தில் செல்ல சலுகை வழங்கப்படவில்லை என்று அதில் வீடு வாங்கியவர்கள் ஒரு புறம் குற்றம் சாட்டிக்கொண்டிருக்கின்றனர். இலவசமாக 10 மணி நேரம் பயணம் செய்ய லேண்டிங் மற்றும் வெயிட்டிங் கட்டணம் செலுத்தவேண்டும் என்று பில்டர் தரப்பில் கூறப்பட்டுள்ளது. ஆனால் ஒப்பந்தம் செய்த போது அது போன்ற எந்த ஒரு விதியும் சேர்க்கப்படவில்லை என்றும், மார்க்கெட் விலையை விட அதிக கட்டணம் கொடுத்து வீட்டை விற்பனை செய்தனர் என்று வீடு வாங்கியவர்கள் குற்றம் சாட்டியுள்ளனர்.

ட்ரம்ப் டவரின் எண்ணிலடங்கா ஆடம்பர வசதிகள் செய்து கொடுக்கப்பட்டுள்ளது. 7 நீச்சல் குளம் மட்டும் இதில் இருக்கிறது. அதோடு நவீன உடற்பயிற்சி சாதனங்களுடன் ஜிம், பிட்னஸ் சென்டர், சர்வதேச தரத்தில் ஸ்பா, கிரிக்கெட் மைதானம், மரவீடுகள், உள்விளையாட்டு அரங்கம் போன்ற ஆடம்பர வசதிகளுடன் 17 ஏக்கரில் இக்கட்டடம் கட்டப்பட்டுள்ளது. இக்கட்டட டிசைனை இத்தாலியை சேர்ந்த பிரபல கட்டட டிசைனர் வரைந்து கொடுத்துள்ளார். இக்கட்டடம் காண்போரை கவரும் விதத்தில் கட்டப்பட்டுள்ளது. புனேயிலும் இதே போன்று ட்ரம்ப் டவர் கட்டப்பட்டுள்ளது. ட்ரம்ப் பெயரை பயன்படுத்தி குடியிருப்பு கட்டடங்கள் கட்டும் பிரத்யேக இந்திய உரிமையை டிரிபேகா டெவலப்பர்ஸ் என்ற நிறுவனம் டொனால்டு ட்ரம்ப் ஜூனியரிடமிருந்து பெற்று இருக்கிறது.

டிரிபேகா நிறுவனத்தின் உரிமையாளர் கல்பேஷ் மேத்தாவுக்கு டொனால்டு ட்ரம்ப் ஜூனியருடன் நெருக்கமாகும். அதனால்தான் ட்ரம்ப் ஜூனியர் பிரத்யேக உரிமையை கல்பேஷ் மேத்தாவிற்கு கொடுத்துள்ளார். கல்பேஷ் மேத்தா இந்தியாவில் உள்ள பிரபல கட்டுமான நிறுவனங்களுடன் இணைந்து ட்ரம்ப் பெயரில் கட்டடங்கள் கட்டும் பணியை மேற்கொண்டுள்ளார். குருகிராம். கொல்கத்தாவிலும் தனியார் நிறுவனங்களுடன் இணைந்து ட்ரம்ப் டவர் கட்டும் பணியில் டிரிபேகா நிறுவனம் ஈடுபட்டுள்ளது. மும்பையில் இரண்டாவது ட்ரம்ப் டவரை பரேல் பகுதியில் கட்ட திட்டமிடப்பட்டுள்ளது. அதோடு ஐதராபாத்திலும் இதனை விரிவுபடுத்த திட்டமிடப்பட்டுள்ளது.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://bit.ly/3PaAEiY

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/3PaAEiY