Vanangaan: "தனித்து நின்று வெற்றி பெற்ற இயக்குநர்" - பாலாவுக்கு எடப்பாடி பழனிசாமி வாழ்த்து

திரைப்பட இயக்குநர் பாலாவுக்கு வாழ்த்துச் செய்தியை பகிர்ந்துள்ளார் எதிர்கட்சித் தலைவர் எடப்பாடி பழனிசாமி.

பாலா திரையுலப் பயணத்தைத் தொடங்கி 25 ஆண்டுகள் முடிவடைவதையும், அவரது வணங்கான் பட இசை வெளியீட்டு விழாவையும் இணைந்து கொண்டாடும்படி இன்று மாலை சென்னை நந்தம்பாக்கம் ட்ரேட் சென்டரில் விழா நடைபெற உள்ளது.

பாலாவின் 25 ஆண்டுகால திரைப்பயணத்தை வாழ்த்தி சினிமா நட்சத்திரங்கள் உள்ளிட்ட பிரபலங்கள் அவருக்கு வாழ்த்து தெரிவித்து வருகின்றனர்.

அந்த வகையில் எடப்பாடி பழனிசாமி வெளியிட்டுள்ள வாழ்த்து செய்தியில், "தமிழ் திரையுலகில் குறிப்பிடத்தக்க சில இயக்குனர்களில் ஒருவரான இயக்குனர் திரு. பாலாஅவர்களின் திரையுலக வெள்ளி விழாவும், அவர் இயக்கிய 'வணங்கான்' திரைப்படத்தின் இசை வெளியீட்டு விழாவும் திரைப்பட தயாரிப்பு நிறுவனத்தின் சார்பில் வரும் டிசம்பர் 18ஆம் நாள் சென்னையில் நடைபெற இருப்பதை அறிந்து மகிழ்ச்சி அடைகிறேன்.

"போட்டிகள் நிறைந்த தமிழ் திரை உலகில், தனது முதல் படத்தையே வணிக நோக்கமின்றி, சமூக நோக்கத்துடன் வெற்றிப்படமாக எடுத்து, இன்று வரை தனது பாணியை யாருக்காகவும் கைவிடாமல், தனித்து நின்று வெற்றி பெற்றுள்ளார், இயக்குநர் பாலா அவர்கள்.

"வணிக நோக்கமின்றி, சாமான்ய மக்களின் வலியும், வேதனைகளையும் பிரதிபலிக்கும் வகையில் திரைப்படங்களை இயக்கி, கடந்த 25 ஆண்டுகளாக போட்டிகள் நிறைந்த தமிழ் திரையுலகில் தனக்கென ஒரு இடத்தை தேடிக் கொண்டவர் ‘இயக்குனர் திரு பாலா' அவர்கள்.

தனது திரையுலக குரு 'திரு. பாலுமகேந்திரா' என்று பெருமையுடன் கூறிக்கொள்ளும் இயக்குனர் திரு. பாலா அவர்களது கலைப்பயணம் வெற்றியுடன் தொடர வேண்டும்என்று எனது மனமார்ந்த வாழ்த்துக்களை தெரிவித்துக் கொள்கிறேன்." எனக் குறிப்பிட்டுள்ளார்.

சுரேஷ் காமட்சி தயாரித்துள்ள வணங்கான் திரைப்படத்தில் அருண்விஜய் நடித்துள்ளார். உடன் ரோஷ்னி பிரகாஷ், இயக்குநர் மிஷ்கின், சமுத்திரக்கனி, சண்முக ராஜன், அருள்தாஸ் உள்ளிட்ட பலர் நடித்துள்ளனர். ஜி.வி.பிரகாஷ் இசையமைத்திருக்கிறார். படம் வரும் ஜனவரி 10ம் தேதி வெளியாகவிருக்கிறது.