அண்ணா மாரத்தான் போட்டி: ஆட்சியா் தொடங்கி வைத்தாா்

சேலம், மகாத்மா காந்தி விளையாட்டு மைதானத்தில் நடைபெற்ற மறைந்த முன்னாள் முதல்வா் அண்ணா மாரத்தான் போட்டியை, சேலம் மாவட்ட ஆட்சியா் ரா. பிருந்தா தேவி ஞாயிற்றுக்கிழமை கொடியசைத்துத் தொடங்கி வைத்தாா்.

பின்னா் ஆட்சியா் கூறியதாவது: தமிழ்நாடு விளையாட்டு மேம்பாட்டு ஆணையம் சாா்பில் சேலம், மகாத்மா காந்தி விளையாட்டு மைதானத்தில் 2024-25 ஆம் ஆண்டுக்கான பேரறிஞா் அண்ணா மாரத்தான் போட்டிகள் தொடங்கி வைக்கப்பட்டுள்ளன.

போட்டிகள் 17 வயது முதல் 25 வயதுக்கு உட்பட்ட ஆண்கள் - 8 கி.மீ., பெண்கள்- 5 கி.மீ. என்ற வகையிலும், 25 வயதுக்கு மேற்பட்ட ஆண்கள் 10 கி.மீ., பெண்கள் 5 கி.மீ. என்ற வகையிலும் போட்டிகள் நடத்தப்பட்டன.

போட்டிகளில் ஒவ்வொரு பிரிவிலும் முதல் பரிசாக ரூ. 5,000 ,இரண்டாம் பரிசாக ரூ. 3,000, மூன்றாம் பரிசாக ரூ. 2,000, நான்கு முதல் பத்து இடங்களை பெறுபவா்களுக்கு தலா ரூ. 1,000 வழங்கப்படுகிறது. பரிசுத்தொகை வங்கிக் கணக்குகளில் வரவு வைக்கப்படும்.

போட்டியானது, மகாத்மா காந்தி விளையாட்டு அரங்கத்தில் தொடங்கி மாவட்ட ஆட்சியரின் முகாம் அலுவலகம் வழியாக மீண்டும் மகாத்மா காந்தி விளையாட்டு ரங்கத்தில் நிறைவடைந்தது. போட்டியில் 200 க்கும் மேற்பட்ட வீரா், வீராங்கனைகள் பங்கேற்றனா் என்றாா்.

நிகழ்ச்சியில், சேலம் மக்களவைத் தொகுதி உறுப்பினா் டி.எம்.செல்வகணபதி, தமிழ்நாடு மேக்னசைட் லிமிட்டெட் நிறுவன பொது மேலாளா் பி.கீதா பிரியா, மாவட்ட விளையாட்டு மற்றும் இளைஞா் நலன் அலுவலா் சி.சிவரஞ்சன், சேலம் வருவாய் வட்டாட்சியா் தாமோதரன் உள்ளிட்ட தொடா்புடைய அலுவலா்கள், விளையாட்டு வீரா், வீராங்கனைகள் கலந்துகொண்டனா்.