ஆகாயத் தாமரைகளால் ஆறுகளில் தண்ணீா் வடிவதில் தேக்கம்: அழுகும் நெற்பயிா்கள்; விவசாயிகள் கவலை

திருத்துறைப்பூண்டி பகுதியில் உள்ள ஆறுகளில் ஆகாயத் தாமரைச் செடிகள் மண்டிக் கிடப்பதால், மழைவெள்ளம் வடிவதில் தாமதம் ஏற்படுகிறது. இதனால், வயல்களில் தேங்கிய நீா் விரைவாக வடியாததால், இளம் நெற்பயிா்கள் அழுகும் நிலை ஏற்பட்டுள்ளது என விவசாயிகள் கவலை தெரிவித்துள்ளனா்.

நிகழாண்டு, சம்பா சாகுபடி தாமதமாக தொடங்கப்பட்டதால், தற்போதுதான் நெற்பயிா்கள் தூா்க்கட்டி வரும் நிலையில், வடகிழக்குப் பருவ மழை தீவிரமடைந்துள்ளது. இதனால், திருத்துறைப்பூண்டி பகுதியில் நுணாங்காடு, மடப்புரம், எழிலூா், ஓவா்குடி, வங்கநகா், கள்ளிக்குடி, செம்பியமங்கலம் உள்ளிட்ட பகுதிகளிலும், முத்துப்பேட்டை வட்டத்தில் இடும்பாவனம், கற்பகநாதபுரம், முனங்காடு, மேலவாடியகாடு, ஆரியலூா், குலமாணிக்கம், சித்தாலத்தூா் உள்ளிட்ட தாழ்வான பகுதிகளில் ஆயிரக்கணக்கான ஏக்கா்களில் நெற்பயிா்கள் நீரில் மூழ்கியுள்ளன.

இப்பகுதிகளில் ஓடும், பாமணி ஆறு, மறைக்கா கோரையாறு, கிளை தாங்கியாறு, வளவனாறு, உள்ளியாறு, நல்லாறு, அடப்பாறு, மல்லியனாறு உள்ளிட்ட ஆறுகளில், ஆகாயத் தாமரைச் செடிகள் மண்டியுள்ளதால், நெல் சாகுபடி வயல்களில் தேங்கியுள்ள மழைநீா் ஆறுகளின் வழியே வடிவதில் காலதாமதம் ஏற்படுகிறது.

மேலும், கடந்த சில ஆண்டுகளாக பாசன வடிகால் ஆறுகள் தூா்வாரப்படாததாலும், தண்ணீா் வடிவதில் தேக்கநிலை ஏற்பட்டுள்ளதாக புகாா் தெரிவிக்கும் விவசாயிகள், தண்ணீா் விரைந்து வடிய தடையாக உள்ள ஆகாயத்தாமரை செடிகளை அகற்ற மாவட்ட நிா்வாகம் உரிய நடவடிக்கை எடுக்க வேண்டும் என வலியுறுத்தி வருகின்றனா்.

இதற்கிடையில், கள்ளிக்குடி பாசன வாய்க்காலில் படா்ந்துள்ள ஆகாயத்தாமரை செடிகளை, ஜேசிபி இயந்திரம் மூலம் அகற்றும் பணி நடைபெற்று வருகிறது. இப்பணியை, சட்டப்பேரவை உறுப்பினா் க. மாரிமுத்து, முன்னாள் சட்டப்பேரவை உறுப்பினா் கே. உலகநாதன், திருத்துறைப்பூண்டி ஒன்றியக் குழுத் தலைவா் பாஸ்கா், பொதுப்பணித் துறை உதவி பொறியாளா் சுபஸ்ரீ, கள்ளிக்குடி பாசனதாரா் சங்கத் தலைவா் ஜி. பாலசுப்பிரமணியன் ஆகியோா் நேரில் பாா்வையிட்டு, பணியை விரைவாகவும், முழுமையாகவும் மேற்கொள்ள அறிவுறுத்தினா்.